ඉතිරි වෙන කොකෝවා පවුඩර් වලින් හදන්න පුලුවන් කෑම 7ක්

චොක්ලට් කේක් හදනකොට නැතුවම බැරි දෙයක් තමා කොකෝවා පව්ඩර්. කොකෝවා ඇට වලින් හදන මේ පව්ඩර් එකෙන් කේක් විතරක් නෙමෙයි තව ගොඩක් දේවල් හදන්න පුළුවන්. ඉතින් ඔන්න අද කියලා දෙන්න හදන්නෙ ඒ වගේ රෙසිපි ටිකක්. කියවලම බලන්නකො එහෙනම්…

01. Chocolate Balls

අවශ්‍ය ද්‍රව්‍ය:-
කොකෝවා පව්ඩර් ග්‍රෑම් 100
ටින්කිරි ග්‍රෑම් 200

• කොකෝවා පව්ඩර් ටික දෙපාරක් හලාගන්න.
• ටින්කිරි ටික ලිපේ තියලා ටිකක් රත්කරලා ලිපෙන් බාගන්න.
• දැන් හලාගත් කොකෝවා පව්ඩර් ටින්කිරි වලට ටික ටික දාලා කලවම් කරන්න.
• අතේ නොඇලෙන ඩෝ එකක් හදාගන්න.
• මේක විනාඩි 30ක් ෆ්‍රිජ් එකේ තියලා අරං පොඩි බෝල හදාගන්න.
• මේක කොකෝවා පව්ඩර් වල දවටගන්න.

02. Chocolate Slices

අවශ්‍ය ද්‍රව්‍ය:-
කොකෝවා පව්ඩර් මේසහැඳි 3
මාරි බිස්කට් පැකට් 1
කිරි කෝප්ප 1/2
මිල්ක් චොක්ලට් කෝප්ප 1
බටර් ස්වල්පයක්

• මාරි ටික කෑලි කඩලා ග්‍රයින්ඩ් කරගන්න.
• මේකට කොකෝවා පව්ඩර් ටිකත් දාලා ග්‍රයින්ඩ් කරගන්න.
• දැන් මේක බෝල් එකකට දාලා කිරි ටික දාගන්න.
• හොඳට අනලා ඩෝ එකක් හදාගන්න.දැන් මේක බටර් ගාගත් ලෑල්ලක තියලා අතින් සිලින්ඩරාකාරව හදාගන්න.
• ඊළඟට ක්ලින් රැප් එකක ඔතලා විනාඩි 30ක් ෆ්‍රීස් කරගන්න.
• ඊළඟට මේක පෙති කපාගන්න.
• චොක්ලට් ටික ඩබල් බොයිල් කරගන්න.මේ කපාගත් පෙති චොක්ලට් වල ඩිප් කරලා ෆ්‍රීස් කරගන්න.

03. Chocolate Bread Dessert

අවශ්‍ය ද්‍රව්‍ය:-
කොකෝවා පව්ඩර් මේසහැඳි 4
කපාගත් පාන් කෑලි කෝප්ප 1
සීනි කෝප්ප 1/2
කිරි කෝප්ප 3
අගර් අගර් මේසහැඳි 2
බටර් ස්වල්පයක්

• බෝල් එකකට කොකෝවා පව්ඩර්, පාන් කෑලි, සීනි, අගර් අගර් හා කිරි දාලා හොඳට බ්ලෙන්ඩ් කරගන්න.
• ඊළඟට මේක පෑන් එකකට දාලා අඩිය අල්ලන්න නොඳී හැඳිගාමින් රත් කරගන්න.
• බුබුළු දානකොට ලිපෙන් බාලා බටර් ගාගත් ට්‍රේ එකකට දාලා පැය2ක් ෆ්‍රිජ් එකේ සෙට් වෙන්න තියන්න.
• ඊළඟට හෙමින් අනික්පැත්ත හරවලා කෑලි කපාගන්න.

04. Chocolate Peda

අවශ්‍ය ද්‍රව්‍ය:-
කොකෝවා පව්ඩර් මේසහැඳි 2
ගිතෙල් මේසහැඳි 2
කිරිපිටි කෝප්ප 1
කුඩුකරගත් සීනි කෝප්ප 1/4
කිරි කෝප්ප 1/4
චොප්කරගත් පිස්ටාචියෝ ස්වල්පයක්

• පෑන් එකක් ලිපේ තියලා ගිතෙල් ටිකක් දාගන්න.
• මේකට කිරිපිටි, සීනි හා කිරි දාලා කලවම් කරගන්න.
• අඩු ගින්දරේ දිගටම හැඳිගාන්න.
• මිශ්‍රණය තික් වෙලා පෑන් එකෙන් ගැලවිලා එක ගුලියක් වගේ එනකල් ලිපේ තියාගන්න.
• දැන් සොෆ්ට් ඩෝ එකක් හැදුනම ලිපෙන් බාලා කොකෝවා පව්ඩර් එකතු කරන්න.
• දැන් අතින් බෝල හදලා මැදින් පොඩි හිලක් හදලා පිස්ටාචියෝ ටිකක් තියාගන්න.

05. Banana Brownie

අවශ්‍ය ද්‍රව්‍ය:-
කොකෝවා පව්ඩර් මේසහැඳි 2
කෙසෙල් ගෙඩි 2
බිත්තර 1
පාන්පිටි මේසහැඳි 1
සීනි මේසහැඳි 1
බේකින් පව්ඩර් තේහැඳි 1/2
චොප්කරගත් මිල්ක් චොක්ලට් කෝප්ප 1/2

• කෙසෙල් ටික හොඳට මෑශ් කරගන්න.
• මේකට බිත්තරය දාලා විස්ක් කරගන්න.
• ඊළඟට කොකෝවා පව්ඩර් ‍ටික හලලා එකතු කරන්න.
• පාන්පිටි හා සීනි හා බේකින් පව්ඩර් එකතු කරන්න.
• හොඳට කලවම් කරලා මයික්‍රොවේව් ට්‍රේ එකකට දාලා විනාඩි 3-4ක් මයික්‍රොවේව් කරගන්න.
• උඩින් මෙල්ට් කරගත් චොක්ලට් ටිකක් දාගන්න.

06. Hot Chocolate Drink

අවශ්‍ය ද්‍රව්‍ය:-
කොකෝවා පව්ඩර් කෝප්ප 1/4
කිරි කෝප්ප 2
සීනි මේසහැඳි 2
ෆ්‍රෙශ් ක්‍රීම් මේසහැඳි 2
වැනිලා ස්වල්පයක්

ටොපින් එකට:-
විප්ක්‍රීම් කෝප්ප 1
අයිසින් සුගර් මේසහැඳි 2
වැනිලා ස්වල්පයක්

• කිරි ටික ලිපේ තියලා කොකෝවා පව්ඩර් දාගන්න.
• මේකට සීනි හා ක්‍රීම් දාලා විස්ක් කරගන්න.
• අඩු ගින්දරේ රත් කරගන්න.
• වැනිලා ටික දාගන්න.
• නටනකොට ලිපෙන් බාගන්න.
• වෙනම බෝල් එකක විප්ක්‍රීම් වලට අයිසින් සුගර් හා වැනිලා දාලා ස්ටිෆ් වෙනකල් බීට් කරගන්න.
• දැන් ග්ලාස් එකකට හොට් චොක්ලට් දාලා උඩින් විප්ක්‍රීම් ටික දාලා කොකෝවා පව්ඩර් ටිකක් ඉසගන්න.

07. Chocolate Pudding

අවශ්‍ය ද්‍රව්‍ය:-
කෝප්ප 1/4
කෝන්ෆ්ලා කෝප්ප 1/4
කිරි කෝප්ප 1 1/2
සීනි කෝප්ප 1/4
ක්‍රීම් 1/2
චොක්ලට් චිප්ස් කෝප්ප 1/2
ලුණු ස්වල්පයක්

• කෝකෝවා පව්ඩර් හා කෝන්ෆ්ලා බෝල් එකකට දාලා කිරි කෝප්ප 1ක් දාලා හොඳට විස්ක් කරගන්න.
• දැන් මේක පෑන් එකකට දාලා ලිපේ තියන්න.තව කිරි කෝප්ප 1/2ක් දාලා අඩු ගින්දරේ හැඳිගාන්න.
• සීනි ටිකත් දාගන්න.
• සීනි දියවෙනකොට ක්‍රීම් ටික දාගන්න.
• ඊළඟට චොක්ලට් චිප්ස් ටිකත් දාගන්න.ටිකකින් මේක තික් වෙනකොට රස අනුව ලුණු දාගන්න.
• දැන් ලිපෙන් බාලා ඩෙසර්ට් ග්ලාස් වලට දාලා නිවෙන්න තියලා ෆ්‍රිජ් එකට දාගන්න.
• උඩින් චොප්කරගත් චොක්ලට් ටිකක් දාලා කෑමට ගන්න.