විදෙස් රටවලින් අපිට තිළිණ කරපු හොඳම ටෙලි නාට්‍ය අත්දැකීම් 7ක්

අපි මේ හදන්නේ ඔබේ අතීතකාමයක් අවුස්සන්නයි. කාලයක් තිබ්බා අපේ රටේ ටෙලිනාට්‍ය ප්‍රේක්ෂකාගාරය කුල්මත් කරවන්න සමත් වුණ විදේශීය ටෙලි නාට්‍ය රැල්ලක්. 90 දශකයෙන් මෙහාදී ආරම්භ වුණු ඒ අතිශය ජනප්‍රිය විදේශීය ටෙලි ආගමනය අපේ රටේ මිනිස්සුන්ට ඉතාම යහපත් ආකාරයේ බලපෑමක් සිද්ධ වුණා වගේම ඉන්ටර්නෙට්, යූ ටියුබ් නැති ඒ කාලේ ලාංකිකයන් විදිහට අපිට ජාත්‍යන්තර මට්ටමේ නිර්මාණ රසවින්දනයක් ලබා ගන්න පුළුවන් වුණේ රාජ්‍ය නාලිකා හරහා විකාශය වුණු ඒ ප්‍රමිතිගත නිර්මාණ වලට ස්තූති වන්නටයි. විශේෂයෙන්ම 90 දශකයේ දරුවන් විදිහට හැදුණ වැඩුන පරම්පරාව තුළ අදටත් ඒ නිර්මාණ රසය කිසිසේත්ම අමතක වෙලා නෑ. ඉතින් අද අපි ඔබට කියන්නේ එවැනි නිර්මාණ 7ක තොරතුරුයි. මීට අමතරව ඔබේ මතකයේ ආරක්ෂා කරගෙන ඉන්න තවත් නිර්මාණ බොහෝමයක් ඇති. ඒවායේ මතකයන් සහ තොරතුරු පහතින් කමෙන්ට් කරලා මේ ලිපිය කියවන හැමෝමත් එක්ක බෙදා හදා ගමු…

 

01. ඔෂින්

ඔෂින් කියන්නේ ජපානයේ අතිශය ජනප්‍රිය උදෑසන රූපවාහිනී මාලා නාට්‍යයක්. ජාතික රූපවාහිනියේ විකාශය වුණු ඔෂින් පිළිබඳව අපිටත්, අපේ වැඩිහිටි පරම්පරාවටත් තියෙන්නේ ඉතාම ආදරණීය මතකයක්. එය මුලින්ම NHK (ජපානයේ රාජ්‍ය රූපවාහිනිය) හි විකාශය වුණේ 1983 අප්‍රියෙල් 4 සිට 1984 මාර්තු 31 දක්වා කාලයේදීයි. කොටස් 297 ක කථාංග කාලයක් පුරා විහිදෙන්න​ට මෙය  නිර්මාණය කර තිබෙනවා. එය මෙතෙක් ලොව වැඩිපුරම නරඹන ලද කතා මාලාවක් වන අතර තවත් රටවල් 68 ක විකාශය වී තිබෙනවා. ඔෂින් පදනම් වී ඇත්තේ 1980 ට පෙර මෙයිජි කාල සමයේ ජීවත් වූ “ෂින් තනෝකුරා” නම් ජපාන ජාතික කාන්තාවකගේ චරිතාපදානය මත වන අතර එය නිරූපණය කළේ “කට්සු වාඩා” යි. ඇය සිය සැමියා වන රයෝහෙයි වාඩා සමඟ “යාඔහාන්” නම් සුපිරි වෙළඳසැල් දාමය ආරම්භ කරමින් නොයෙකුත් අසීමිත බාධා සමග ගැටී ජීවිතය ජය ගත් සාර්ථක ජපාන ව්‍යවසායිකාවක්. 

 

02. නයිට් රයිඩර්

නයිට් රයිඩර් කියන්නේ ග්ලෙන් ඒ. ලාර්සන් විසින් නිර්මාණය කරන ලද ඇමරිකානු නිර්මාණයක්. නයිට් රයිඩර් හි හරය එහි රූපවාහිනී කතා මාලා හතරකින් දිව යනවා : නයිට් රයිඩර් (1982-1986), ටීම් නයිට් රයිඩර් (1997-1998) සහ නයිට් රයිඩර් (2008-2009). මෙම කතා සංකල්පය ලැබූ අතිශය ජනප්‍රියත්වය නිසාම එයින් රූපවාහිනී චිත්‍රපට තුනක්, පරිගණක හා වීඩියෝ ක්‍රීඩා සහ නවකතා මෙන්ම නයිට් රයිඩර් සංගම්ද නිර්මාණය වී තිබෙනවා. ගොඩක් දුරට එවකට සමාජයේ පොප් සංස්කෘතික අංග මේ තුළත් අන්තර්ගතයි. මුල් නයිට් රයිඩර් කතා මාලාව අනුගමනය කළේ තාක්‍ෂණිකව දියුණුව, කෘතිමව බුද්ධිමත්  KITT  නැමැති මෝටර් රථයක් භාවිතා කරන නවීන අපරාධ සටන්කරුවෙකු වන මයිකල් නයිට්ගේ වික්‍රමයන් ගැනයි. මයිකල් නයිට්ගේ චරිතයට ජනප්‍රිය නළු ඩේවිඩ් හැසල්හොෆ් පණ පෙවූ අතර විලියම් ඩැනියෙල්ස් KITT වෙනුවෙන් හඬ කවනු ලැබුවා. මයිකල් නයිට් සහ ඔහුගේ සගයා කිට් (KITT) සතුරන් සමඟ සටන් වදිමින්, අපරාධ විසඳමින් ශ්‍රී ලාංකික ප්‍රේක්‍ෂකයන් අතරට පැමිණියේ අනූව දශකයේ අග භාගයේ ITN නාලිකාව හරහායි. තවමත් Knight Rider කිව් සැනින් එහි තේමා සංගීතය හිතේ රැවුපිළි දෙන තරමටම මෙය ලංකාවේ ලොකු කුඩා කා අතරත් ජනප්‍රිය වුණු ටෙලි නාට්‍ය මාලාවක් වුණා.

 

03. රොබින් හුඩ්

ඉංග්‍රීසි සාහිත්‍යයේ අතිශයින් රසවත් වීර කතාවක් වූ රොබින් හුඩ් හා ෂර්වුඩ් වනාන්තරයේ නිදහස් මිනිසුන්ගේ වීරත්වයේ කතාව රැගත් ජාතික රූපවාහිණියේ විකාශය වුණු අතිශය ජනප්‍රිය නිර්මාණයක් තමයි රොබින් හුඩ්. කඩවසම් මයිකල් ප්‍රේඩ් (Micheal Praed) රොබින් හුඩ් නමින් ද මැරියන් ලෙස රඟ පෑ ජූඩි ට්‍රොට් (Judy Trott) යන ශිල්පීන්ගේ අති විශිෂ්ට චරිත නිරූපණය මෙම නිර්මාණය ජනප්‍රිය වීම සඳහා විශාල වශයෙන් ඉවහල් වුණා. මෙය පාදක කරගෙන බොහෝ නිර්මාණ බිහි වුණත් 1980 ගණන්වල තිරගත වූ රිචර්ඩ් කාපෙන්ටර්ගේ තිර රචනයෙන් සහ HTV – Goldcrest Films සමූහ නිෂ්පාදනයෙන් එළි දැක්වුණු Robin of Sherwood යන ටෙලි නාට්‍යය තමයි ලොව වටා ප්‍රේක්ෂකයන්ගේ සිත් දිනා ගැනීමට සමත් වුණේ. 1957 දී ඩේවිඩ් කරුණාරත්න මහතා මුල් වරට රොබින් හුඩ්ගේ කතන්දරය රසවත් බසකින් සිංහලයට පරිවර්තනය කළ අතර 1990 දශකයේ අග භාගයේදි ටයිටස් තොටවත්තයන් ඇතුළු  හඬ කැවීමේ කණ්ඩායම, සිංහල උපශීර්ෂ සහිතව රිචඩ් කාපෙන්ටර් ගේ ජනප්‍රිය ටෙලි නාටකය ‘ෂර්වුඩ් කැලේ රොබින්’ ලෙස ජාතික රූපවාහිණියෙන් ලාංකික රසිකයන්ගේ ආලින්දයට ගෙනාවා. රොබින් හුඩ් නාට්‍ය මාලවට පසුබිම් කරගන්නේ ක්‍රි.ව. 1189-1199 දක්වා බ්‍රිතාන්‍ය කිරුළ දැරූ පළමුවැනි රිචඩ් රජුගේ කාල පරිච්ඡේදය සහ නෝමන් වරුන්ගේ යටතට පත් වූ, කුරුස යුද්ධය පැවති සමයේ මධ්‍යතන එංගලන්තයයි. එකල පැවති පාලන යන්ත්‍රයට විරුද්ධව ප්‍රබල සටනක් කිරීම හේතු කොට ගෙන රොබින් හුඩ් ධනවතුන්ගෙන් කොල්ල කා දුප්පතුන්ව රජ කරවන අනීතිකයකු ලෙස ප්‍රකට වුණා. රොබින් හුඩ්, පිටුවහල් කරනු ලැබූ ස්වකීය විප්ලවකාරි තරුණ කල්ලිය සමඟ ෂර්වුඩ් වනාන්තරයේ කළ දස්කම් රිචර්ඩ් කාපෙන්ටර් ඉතා අපූරු ටෙලි සිත්තමක් ලෙස ප්‍රේක්ෂකයා වෙත ගෙන ආවා. 

 

04. රොබින්සන් අන්දරය

අපි පුංචි කාලේ රූපවාහිණියෙන් නරඹපු බලපු ඉංග්‍රීසි කතා මාලා අතරේ තිබුණු තවත් අමතක නොවනම කතාවක් තමයි “රොබින්සන් අන්දරය”. නවසීලන්ත රූපවාහිනී නාලිකාවක ප්‍රදර්ශනය කරපු මේ කතා මාලාව සිංහල බසට හඬ කවලා ජාතික රූපවාහිනියෙන් තමයි ශ්‍රී ලාංකික ප්‍රේක්ෂකාගාරයට තිළිණ කළේ. ඩේවිඩ්, එලිසබෙත්, අර්නස්ට්, ජොආනා, ක්‍රිස්ටිනා ඇතුළු චරිත ගණනාවක් අපේ මතකයේ රන්දපු රොබින්සන් අන්දරය 90 දශකයේ අග භාගයේ වගේ ම, ඊටපස්සෙත් වාර කීපයක් අපට දකින්න ලැබුණා. මේ කතාව ගොඩ නැගුණේ 1812 අවුරුද්දේ පල වුණු The Swiss Family Robinson කියන නවකතාව පදනම් කරගෙනයි. ජොහාන් ඩේවිඩ් නම් ප්‍රසිද්ධ නවකතාකරු රචනා කරපු මේ කතාව ලෝකය පුරා රටවල් ගණනාවක ජනප්‍රිය වුණා. ඒ ජනප්‍රියත්වය නිසා ම චිත්‍රපට, ටීවී කතාංග කීපයක් ම මේ ඇසුරෙන් නිර්මාණය කෙරුණා. හැබැයි ඒවා අතරින් වැඩි ම ප්‍රසිද්ධියක් ලැබුවේ The Adventures of Swiss Family Robinson කතාව වග අවිවාදයෙන් ම කියන්න පුළුවන්. මෙහි පවුලේ තාත්තා හෙවත් ඩේවිඩ් රොබින්සන් ලෙස ප්‍රධාන චරිතයට පණ පෙව්වේ ඇමෙරිකානු ජාතික නළුවෙක් වුණු රිචර්ඩ් තෝමස් වන අතර එලිසබෙත් රොබින්සන් ලෙස මවගේ චරිතයට පණ දුන්නේ මාර්ගෝ ගුන් නම් ඉංග්‍රීසි ජාතික රංගන ශිල්පිනියයි.

 

05. පරිගණක දඟයෝ 

ජාතික රූපවාහිණියේ විකාශය වුණු ක්‍රෑෂ් සෝන් හෙවත් පරිගණක දඟයෝ යනු ඕස්ට්‍රේලියානු ළමා විද්‍යා ප්‍රබන්ධ රූපවාහිනී කතා මාලාවක් වන අතර එය 1999 පෙබරවාරි 13 සිට 2001 අගෝස්තු 25 දක්වා Seven Network ඔස්සේ විකාශය වුණා. එය ඩිස්නි නාලිකාව හා සම්බන්ධව ඕස්ට්‍රේලියානු ළමා රූපවාහිනී පදනම විසින් නිෂ්පාදනය කරන ලද අතර කථාංග 26 ක් දක්වා දිග හැරුනා. මෙම ටෙලි කතා මාලාව සුවිශේෂී වූයේ මුල් වතාවට එවකට අන්තර්ජාලය හා සම්බන්ධව වීඩියෝ ක්‍රීඩා කර්මාන්තය සහ කෘතිම බුද්ධි සංකල්පය යොදා ගත් පළමු රූපවාහිණී නිර්මාණය වූ නිසයි. මයික් හැන්සන් (නිකොලායි නිකොලාෆ්), ඇලිසන් පයි රෙන්ෆ්‍රි (කැසැන්ඩ්‍රා මැග්‍රාත්), රෙබෙකා බෙක් චෑන් (ෆ්‍රැන්සිස් වැන්ග්), මාර්සෙලෝ ඩී කැම්පිලි (පෝල් පැන්ටානෝ) සහ ඒබ්‍රහම් රාම් ෆෝලි (ඩේමියන් බොඩි) මෙල්බර්න් උසස් පාසැල් සිසුන් පස් දෙනා ලෙස අති දක්ෂ රංගනයක නියැලෙනවා. කැටලිස්ට් නම් මෘදුකාංග සමාගමේ සභාපති ඇලෙක්සැන්ඩ්‍රා ඩේවිස් චරිතයට පණ පොවන්නේ නිකී වෙන්ඩ්ට් නම් ශිල්පිණියයි. 

 

06. මල්ගුඩි දවස

මෙච්චර කාලෙකට අපේ රටේ විකාශය වුණු ඉන්දියානු ටෙලි නාට්‍ය අතුරින් කටක් ඇරලා ගුණාත්මක නිර්මාණයක් කියලා කියන්න පුළුවන් කතාවකට තියෙන්නේ මෙච්චරම ද මන්දා. 

ඉන්දියාවේ උසස්‌ සාහිත්‍ය නිර්මාණකරුවන් අතරින් ඉහළින්ම කැපී පෙනෙන අයකු ලෙස ආර්. කේ. නාරායන් මහතා ඉදිරියෙන් සිටින්නේ ඔහු ළමා පරපුර වෙනුවෙන් වටිනා සේවාවන් රැසක් ඉටු කර ඇති නිසයි. ළමුන්ගේ සිත් සතන් කථාන්දර මගින් ප්‍රබෝධයට පත්කරවමින් අපූරු ලොවකට රැගෙන ගිය මෙම කෘතහස්‌ත ලේඛකයා තමයි “මල් ගුඩි දවස” කථාන්තරයේ නිමවුම් කරු වන්නේ. ජාතික රූපවාහිණිය ඔස්‌සේ “මල් ගුඩි දවස” අපිත් නැරඹුවේ ඒ අභිරුචිය නිසයි. ආර්. කේ. නාරායන් බ්‍රාහ්මණ වංශිකයකු වූ අතර මොහු පවුලේ තුන්වැන්නායි. සිය මිත්තනියගෙන්, මවගෙන්, පියාණන්ගෙන් ළමා වියේදී සිටම රසබර කථා ඇසීමට ඔහු වඩාත් කැමැති වී තිබෙනවා. පවුලේ සමීප වැඩිහිටියන්ගේ සිඟිති සේම වැදගත් කථාන්තර අසා ඒවා යළි තම සිහි මිතුරන්ට පොහොර දමා තවත් රසකර කියාදීම පමණක්‌ නොව අලුතින්ද කථා ගොතා කීමටද සහජ හැකියාවක්‌ උරුම කර ගත් දක්ෂයෙක් තමයි එතුමන්. ඒ අනුව තමන් ළමා වියේදී ඇසූ දුටු දේවල් පසක්‌ කරමින් ඔහු විසින් “මල් ගුඩි දවස” කථා සම්පාදනය කර තිබෙනවා. 

මල්ගුඩි කියන්නේ ආර්.කේ. නාරායන්ගේ නවකතා හා කෙටිකතාවල දකුණු ඉන්දියාවේ පිහිටා ඇති ප්‍රබන්ධ නගරයක්. එය නාරායන් ගේ බොහෝ කෘති සඳහා පසුබිම සකසා තිබෙනවා. මල්ගුඩිය රූ ගත කලේ දකුණු ඉන්දියාවේ අගුම්බේ ගම්මානයෙයි. 

 

07. සුජාත දියණි

සුජාත දියණි නම් අතීතයට අයිති නෑ. මෑත කාලීනව ලංකාවේ ප්‍රේක්ෂකාගාරයට කොරියානු ටෙලි නාට්‍ය අත්දැකීමක් ප්‍රථම වරට සමීප වුණේ සුජාත දියණි සමඟයි. මීට වසර 500 කට පෙර කොරියාවේ චොසුන් රාජවංශයේ පළමු රාජකීය වෛද්‍යවරිය බවට පත්වූ ජැං ජුම් නම් තරුණියගේ කතාව තමයි මේකෙන් දිග හැරුණේ. කොරියානු ජනරජයේ පරිත්‍යාගයක් ලෙස ශ්‍රී ලංකා රූපවාහිනී සංස්ථාව මඟින් විකාශනය කරන ලද අතිශය ජනප්‍රියත්වයට පත් වූ ටෙලි නාට්‍යයක් වන ‘සුජාත දියණි‘ කථාංගයේ ප්‍රධාන නිළිය ලෙස රඟපෑවේ ලී යන්ග් ඒ (Lee Young Ae) රංගන ශිල්පිණිය විසිනුයි. තම ස්වෝත්සාහයෙන් ජීවිතය ජයගන්නා ජෑන් ගන් එහෙම නැත්නම් අපි දන්නා විදියට චන්ගුමී කියන දිරිය දියණියගේ සත්‍ය ජීවිත කතාව තමයි මේකේ තියෙන්නේ. මෙයාගේ අම්මා රාජකීය මුළුතැන්ගෙයි සුපවෙදිනියක් ලෙස කටයුතු කරනවා. අම්මාගේ කැමැත්ත වෙන්නේ මෙයාව රාජකීය මුළුතැන්ගෙයි ප්‍රදාන සූපවෙදිනිය කිරීමයි .ඒත් මෙයා පුංචි කාලෙදිම මෙයාගේ අම්මාව කුමන්ත්‍රණයක් නිසා මරණයට පත්වෙනවා.මේ තත්වය නිසා ජෑන් ගන් (චන්ගුමී) ඉතා අසරණ තත්වයට පත්වෙනවා.රජුගේ මුළුතැන්ගෙදර සේවය කරන පුද්ගලයෙක් නිසා මෙයාට රාජකීය මුළුතැන්ගෙයි සේවිකාවක් විදියට සේවය කිරීමට අවස්තාවක් ලැබෙනවා. මෙලෙස තම ජීවිතය ආරම්භ කරන මෙම දිරිය දියණිය තම ජීවිතයට එල්ලවෙන විවිධ බාධක ජයගනිමින් රාජකීය මුළුතැන්ගෙයි ප්‍රධාන සුපවෙදිනිය බවට පත්වීමේ සිහිනය සැබෑකර ගනිමින් අවසානයේදී රාජ මාළිගාවේ රාජකීය වෛද්‍යවරිය බවට පත් වෙනවා. මෙය කොරියාවේ විකාශය වුණේ 2003 සැප්තැම්බර් 15 සිට 2004 මාර්තු 23 අතර කාලයේයි. රූපවාහිනියේ ජනප්‍රියම කාන්තාවන් සඳහා බේක්සාං කලා සම්මානය, හොඳම රූපවාහිනී අධ්‍යක්ෂවරයා සඳහා බේක්සාං කලා සම්මානය ආදී කොරියානු රජයේ අතිශය ඉහළ මට්ට්ටමේ සම්මාන රැසකින් පිදුම් ලැබීමට මෙය සමත් වුණා.