ඉස්සර අපි පොඩි කාලේ, තාත්තලා ගාව තිබුණු චෙක් පොත කියන්නේ අපේ කුතුහලය ස්ථානගත වුණු එක දෙයක්. කොහොමත් ඒ කාලෙදිම චෙක් එකක් කියන්නේ බොහොම සීරියස්, සල්ලි සම්බන්ධ, ගොඩක් වටිනා දෙයක් කියන එක කියලා දීලා තිබුණු නිසා, චෙක් පොතෙන් හොරෙන් කොළයක් ගලෝගන්න, අපිත් තාත්තා කරනවා වගේ චෙක් එකක් අස්සන් කරලා බලන්න වගේ නස්පි වැඩ නං චෙක් පොතත් එක්ක කරන්න ගිහින් නෑ. හැබැයි චෙක් පොත අරගෙන පෙරළලා බලන එක පවා හරිම ආස්වාදයක් වුණා කියන එක බොරු නෙවෙයි. ඒ විතරක්ද, අර චෙක් පොත දාලා තිබුණු ලෙදර් පොත වගේ හුරුබුහුටි කවරෙත් මාරම ආතල්. ඇත්තම කිව්වොත් ඔය කාලෙදී අපිත් හීන දැක්කා කවදාහරි ලොකු වෙලා චෙක් පොතක් ගන්න. වෙන මොකකටවත් නෙවෙයි, අර වගේ හුරුබුහුටි ලෙදර් පොතක් වගේ කවරෙක දාලා ගාම්භීර තාලෙට චෙක් පොතක් යන යන තැන අතේ අරගෙන යන එකේ තියෙන මෙව්වා එක, චෙක් එකක් සයින් කරලා කාටහරි දෙන එකේ ගැම්ම අත්විඳින්න!
හරි, දැන් ඉතින් අපි ලොකු මිනිස්සු වෙලා. දැන් අපිට ඇත්තටම චෙක් පොතක් භාවිතා කරන්න පුළුවන් මට්ටමකට ඇවිල්ලා ඉන්නවා කියලා හිතමුකෝ. ඉතින් ඇයි අපි එහෙමනම් චෙක් පොතක් පාවිච්චි කරන්නෙ නැත්තේ? දැන් කාලේ හැමෝම වගේ විශාල වශයෙන් භාවිතා කරන්නේ ඔන්ලයින් පේමන්ට් සිස්ටම්ස් නේ. හැබැයි එහෙම වුණත්, තාමත් චෙක් ගනුදෙනු කියන්නේ සෑහෙන්න සිද්ධ වෙන දෙයක්. ඒකට හේතු කීපයක්ම තියෙනවා.
1. සල්ලි පාවිච්චිය මගාරින්න හොඳයි
මේක ඉතින් සරලම කාරණාවක්. දැන් කාලේ අපි හැමෝම උත්සහ කරන්නේ පර්ස් එකේ සල්ලි පුරෝගෙන ඉන්න එකෙන් අත්මිදෙන්නනේ. ඒක ආරක්ෂාව පිළිබඳ ප්රශ්නයක් විතරක් නෙවෙයි, පහසුව පිළිබඳ ප්රශ්නයකුත් වෙනවා. ඒ කියන්නේ, අපිට සල්ලි අතේ තියාගෙන ඉන්නෙ නැතුව, සල්ලි ටික බැංකුවේ එකවුන්ට් එකේ තියාගෙන, එදිනෙදා හැම වැඩකදීම ඇත්තටම සල්ලි හුවමාරු නොවෙන විදියට වැඩ කරන්න පුළුවන් නම් ඒක ඉතාම පහසුයි. ඒකට හොඳම ක්රමවේද තමයි ක්රෙඩිට් කාඩ් හෝ ඩෙබිට් කාඩ් පාවිච්චියත්, ඒ වගේම හොඳ ඉලෙක්ට්රොනික් වොලට් එකක් පාවිච්චි කරන එකත්. දැන් ඔය කාඩ් සහ ඊ-වොලට් එක්ක බලනකොට චෙක් ගනුදෙනු ටිකක් කරදරකාරීයි කියලා හිතෙන්න පුළුවන්. හැබැයි ඒත් තාමත් සල්ලි අතේ තියාගෙන පාවිච්චි කරන එක මගාරින්න, චෙක් පාවිච්චිය හොඳ ක්රමයක්.
2. ආරක්ෂාව අතින් හොඳයි
චෙක් පාවිච්චියේ තියෙන හොඳම දෙයක් තමයි ආරක්ෂාව. මොකද, ඕනම කෙනෙක්ට ඕනම විදියකට චෙක් එකක් අරගෙන ගිහින් එසැණින් සල්ලි කරගන්න බෑ. උදාහරණයක් විදියට, අපි කියමු යම් කිසි කෙනෙක්ට විතරක් සල්ලි කරගන්න හැකි විදියට චෙක් එකක් දෙන්න අපිට අවශ්යයි කියලා. කරන්න තියෙන්නේ එයාගේ එකවුන්ට් එකේ නමට රේඛනය කරලා චෙක් එක ඉෂූ කරන්න විතරයි. එතකොට ඒ චෙක් එක මුදල් වෙන්නේ ඒ අදාළ කෙනාගේ එකවුන්ට් එකට විතරමයි. අනික, කෑෂ් චෙක් එකක් හොරකම් කරලා බැංකුවට දුන්නත්, එසැණින් පට ගාලා මුදල් වෙන්නෙ නැති නිසා, ඇක්ෂන් එකක් ගන්න යම් කාලයකුත් තියෙනවා.
3. ප්රොෆෙෂනල්
ඇත්තටම මේක චෙක් පාවිච්චියේ තියෙන හොඳම දෙයක්. ඒ තමයි ප්රොෆෙෂනල් බව. දැන් මෙහෙම හිතමුකෝ. අපිට ලයිට් බිලක් ගෙවන්න චෙක් එකක් දෙන එකෙන් ලොකු වෙනසක් වෙන්නෙ නෑ. හැබැයි අපි යම් කිසි කෙනෙක් අපි වෙනුවෙන් කරපු ප්රොෆෙෂනල් කාර්යයක් සඳහා පේමන්ට් එකක් කරන්න අවශ්යයි. අපි ඒක චෙක් එකකින් දෙනවා. අන්න එතන තියෙනවා හොඳ ප්රොෆෙෂනල් කමක්. ඒ සමස්ත ගනුදෙනුවටම හොඳ වෘත්තීය මුහුණුවරක් ලැබෙනවා චෙක් එකකින් අපි පේමන්ට් එක කරනකොට. විශේෂයෙන්ම අපිට මොකක් හරි බිස්නස් එකක් එහෙම තියෙනවා නම්, චෙක් පේමන්ට්ස් කරන එකෙන් ඒ බිස්නස් එකේ තියෙන ප්රොෆෙෂනල් ගතිය වැඩි වෙනවා.
4. විමර්ෂණ කරදර අඩුයි
දැන් කාලේ විශේෂයෙන්ම අපිට දකින්න ලැබෙන දෙයක් තමයි, අපේ බැංකු ගිණුමකට එන සල්ලි වගේම, අපේ බැංකු ගිණුමකින් එලියට යන සල්ලි ගැනත් ප්රමාණවත් අවධානයක් තියෙනවා කියන එක. විශේෂයෙන්ම ඔය ලොකු ගණන් ගනුදෙනු වෙන වෙලාවට ඒ ගැන හොයනවා වැඩියි. උදාහරණයක් විදියට ගත්තොත්, අපි කියමු අපි කරපු මාස කීපෙක වැඩකට එක පාර ලක්ෂ හතඅටක චෙක් එකක් ආවා කියලා. ආයෙ චෙක් එක රියලයිස් වෙන්න ප්රොසෙස් එකට දාන්න කලින් අම්ම මුත්තා වෙනකල් විස්තර හොයනවා බැංකුවෙන්. කොහෙන්ද එව්වේ, ඇයි එව්වේ, මොනවටද එව්වේ, මොනවද කරපු වැඩ, තව කවුද ඒ වැඩේ හිටියේ, ඒ හිටපු අයගෙ අම්ම තාත්ත කවුද යනාදී රටේ නැති ප්රශ්න බැංකුවෙන් අපෙන් අහනවා. හැබැයි ඒකට අපිට මොකුත් කියන්නත් බෑ. මොකද, බැංකුවෙත් ආරක්ෂාවට තමයි එච්චර හොයන්නේ. හැබැයි චෙක් බුක් එකක් තියෙනවා නම්, ඒ කියන්නේ ජංගම ගිණුමක් තියෙනවා නම්, එතන විශ්වාසය වැඩියි. මොකද, ජංගම ගිණුමක් ආරම්භ කෙරෙන්න නම් හොඳ රෙකමන්ඩේෂන් එකක් ඕන මුලින්ම. අන්න ඒ නිසා ජංගම ගිණුමකට යන එන මුදල් ගැන ඔය වගේ දැඩි විමර්ෂණ සිද්ධ වෙන්නෙ නෑ.
5. දින දාලා පේමන්ට්ස් කරන්න හැකියි
මේකත් චෙක් පොතක් පාවිච්චියේ තියෙන ලොකු වාසියක්. දින දාලා පේමන්ට්ස් කරන්න හැකි වීම. ඒක වෙන්නේ මෙහෙමයි. අපි කියමු ඔන්න අපිට තියෙනවා අනිද්දට යම් ගෙවීමක් කරන්න. හැබැයි අපිට අනිද්දට ගෙවීම කරන්න සල්ලි අතේ නෑ. ඒත් අපි දන්නවා හරියටම සතියකින් අපේ අතට සල්ලි එනවා ඒ පේමන්ට් එක කරන්න. දැන් ඕන්නං අපිට පුළුවන්, ඔය ගෙවීම කරන්න තියෙන කෙනාට කියන්න, සතියකින් සල්ලි දෙන්නං කියලා. හැබැයි ඒක දෙන්නං කාසිනේ. ප්රොෆෙෂනල් නෑ. හැබැයි අපිට පුළුවන් එයාට යම් ඇෂුවරන්ස් එකක් දෙන්න. ඒ තමයි ඩේටඩ් චෙක් එකක්! ඒ කියන්නේ, අපි එයාට කියනවා, සතියකට එහා දිනයක් දාලා අපි අදාළ ගෙවීම චෙක් එකකින් කරන්නම්, ඔයා සතියකින් ඒක කෑෂ් කරගන්න කියලා. එතකොට බොහෝ දුරට අනික් පාර්ශවය ඒකට එකඟ වෙන්න පුළුවන්. මොක්ද, ඩේටඩ් චෙක් එකක් කියන්නෙත් සතියකින් ලැබෙන සල්ලිම තමයි නිසා.
දැන් කෙනෙක් අහන්න පුළුවන්, අපිට එහෙම ඩේටඩ් චෙක් එකක් දීලා, එකවුන්ට් එකේ ඒ ගාණ තියාගන්නෙ නැතුව වංචාවක් කරන්නත් බැරිද, එහෙම නිසා කවුරුවත් එහෙම අපෙන් ඩේටඩ් චෙක් එකක් ගනීවිද කියලා. උත්තරේ සරලයි, එහෙම අපි දෙන චෙක් එකකට සල්ලි ගෙවන්න ප්රමාණවත් ගාණක් අපේ ජංගම ගිණුමේ තිබුණෙ නැතිනම්, අපිට පැනල්ටි චාර්ජ් එකක්, දඬුවම් දඩ මුදලක් වදිනවා. එහෙම දිගින් දිගටම චෙක් රිටර්න් වුණොත්, අපේ එකවුන්ට් එක පවා අහෝසි වෙලා අපිව බ්ලැක්ලිස්ට් වෙන අවදානමක් තියෙනවා. අන්න ඒ නිසා, එහෙම ඩේටඩ් චෙක් එක්ක හොර කරන්න කෙනෙක් පෙළඹෙන්නෙ අඩුවෙන්.
6. මුදල් කළමනාකරණයටත් පහසුයි
දැන් කාලේ අපිට මුදල් කළමනාකරණය සඳහා නොයෙකුත් ක්රම තියෙනවා. සරලවම එක්සෙල් ෂීට් එකක අපේ එදිනෙදා, සතිපතා, මාසික වියදම් සටහන් කරගැනීමේ ඉඳලා, ඔය සෑහෙන්න කාර්යක්ෂම ඇප්ස් දක්වා විවිධ ක්රම වලින් අපිට මූල්ය කළමනාකරණය සිද්ධ කරගන්න පුළුවන්. හැබැයි චෙක් පොතක් තියෙන එකෙනුත් ඔය මූල්ය කළමනාකරණයට යම් දායකත්වයක් ලැබෙනවා. හැබැයි ඒක වෙන්නේ අපි මහා පරිමාණයෙන් චෙක් වලින් ගනුදෙනු කරනවා නම් තමයි. එතකොට අපි චෙක් එකක් ඉෂූ කරනකොට, චෙක් පොතේ ඉතුරු වෙන ස්ලිප් එකේ ලියනවනේ ඒ ඉෂූ කරපු චෙක් එකේ ගාණ, කාටද ඉෂූ කලේ කියන එක සහ මොකක් හින්දද ඉෂූ කලේ කියන එක. ආන්න එතකොට, අපි දන්නෙම නැතුව අපේ ගනුදෙනු වල සවිස්තරාත්මක සටහන් ලැයිස්තුවක් අපි ගාව ඉතුරු වෙලා තියෙනවා. ඒක මුදල් කළමනාකරණයට පහසුවක් නෙවෙයිද?
7. බැංකුවෙන් ලැබෙන වාසිත් වැඩියි
චෙක් පාවිච්චියත් එක්ක මෙහෙම දේකුත් තියෙනවා ඉතින්. අපි කලින්ම කිව්වනේ ඔය ලොකු ගණන් එකවුන්ට් එකට යනකොට එනකොට තියෙන විමර්ෂණ, චෙක් පාවිච්චි වෙන ජංගම ගිණුමක් තියෙනකොට සැලකිය යුතු විදියට අඩු වෙනවා කියලා. හැබැයි ඒ විතරක් නෙවෙයි. තව සෑහෙන්න වරප්රසාද බැංකුවෙන් හිමිවෙනවා. දැන් ජංගම ගිණුමේ යම් කිසි මුදලක් තියෙනවා නම්, අපිට ඒකට පොඩ්ඩක් අඩු ගාණක් ඕඩී එකක් විදියට, ඒ කියන්නේ බැංකුවේ තියෙන මුදල පෙන්නලා ගන්න ණයක් විදියට ලබාගන්න පුළුවන්. එතකොට ඔය පුද්ගල ණය, ව්යාපාර ණය එහෙම ලබාගන්නත් වඩාත් පහසුයි ජංගම ගිණුමක් තියෙනවා නම්. දැන් කාලේ නම් අහන්න ලැබෙන විදියට ඔය පුද්ගල ණය දෙන එක පොඩ්ඩක් නවත්තලා තියෙන්නේ. හැබැයි එහෙම වුණාට, පුද්ගල ණය දෙනකොට එහෙම වැඩි ප්රමුඛතාවක් ජංගම ගිණුම් හිමියන්ට ලැබෙනවා කියලා කියන්න පුළුවන්. ඒ ඇරෙන්න ඉතින් බැංකුවක ප්රමුඛ පාරිභෝගිකයෙක්ට ලැබෙන පහසුකම් සහ ප්රමුඛතාවයන් හැම දෙයක්ම, චෙක් බුක් එකවුන්ට් එකක් බැංකුවේ තියෙන කෙනෙක්ටත් ලැබෙනවා. ඒකත් ලොකු දෙයක්නේ, නැද්ද?
දැන් පැහැදිලියිනේ ඇයි මිනිස්සු තාමත් චෙක්පොත් පාවිච්චි කරන්නෙ කියලා. සාමාන්යයෙන් එක එක බැංකුවල කොන්දේසි එහෙන් මෙහෙන් වෙනස් වෙන්න පුළුවන් වුණත්, පොදුවේ චෙක් පොතක් පාවිච්චි කරන්න තියෙන කොන්දේසි සරලයි. බැංකුවේ ජංගම ගිණුමක් පවත්වාගෙන යන්න ඕන. ඒ ජංගම ගිණුමේ නිශ්චිත අවම බැලන්ස් එකක් පවත්වාගෙන යන්නත් ඕන. සාමාන්යයෙන් රුපියල් දහදාහක් වගේ තමයි. අන්න එතකොට අපිට හම්බුවෙනවා චෙක් පොතක්!
Leave a Reply