අද අපි කතාකරන්න හිතුවේ වෙනස්ම විෂයයක් ගැන ලියුවුණු පොත් හතක් ගැන. ඒ තමයි, අභිසරුලියන්, සරලවම කිව්වොත් ලිංගික ශ්‍රමික වෘත්තීය එහෙමත් නැත්නම් ගණිකා වෘත්තිය ගැන ලියවුණු කෘති හතක් ගැන. මේ සමහර පොත් නම් පර්යේෂණාත්මක පොත්. තවත් සමහර ඒවා ප්‍රබන්ධ. ඉතින් එහෙනම් අද අපි ඒ ගැන කතාකරමු.
1. ශ්‍රී ලංකාවේ ගණිකාවෝ
නන්දසේන රත්නපාල මහතාගේ මේ කෘතිය නම් පර්යේෂණාත්මක කෘතියක් විදියට තමයි අපිට හඳුන්වන්න පුළුවන්. ඒ වගේම මේ විෂයය සම්බන්ධයෙන් අපේ රටේ ලියැවුණු හොඳම පර්යේෂණාත්මක ග්‍රන්ථය හැටියටත් මෙය හඳුන්වන්න පුළුවන්. වසර ගණනාවක් පර්යේෂණ කොට, ලිංගික ශ්‍රමික වෘත්තීයේ යෙදෙන සැබෑ පුද්ගලයන්ගෙන් ලබා ගත් තොරතුරු අනුව තමයි මේ කෘතිය රචනා වෙලා තියෙන්නේ. ඒ වගේම මේ කෘතිය හරහා දශක හතරක ගණිකාවන් පරම්පරා තුනක් ගැන තොරතුරු ඇතුළත් වෙනවා.
2. වණ්ණා දාසි
අපේ රටේ ඉන්න දක්ෂ පරිවර්තිකාවක් වන කත්‍යානා අමරසිංහ තමයි මේ කෘතිය රචනා කළේ. එම වසරේ ස්වර්ණ පුස්තක අවසන් වටයටත් නිර්දේශ වෙන්න මේ කෘතිය සමත් වුණා. මේ කෘතියට සරලවම පාදක වෙන්නේ අමා කියන චරිතය. දුෂ්කර පළාතක ජීවත් වන ගණිකාවකගේ දියණියක් වුණු ඇය මෝස්තර නිරූපණ ශිල්පිනියක් දක්වා යන ගමනයි මේ පොතට පාදක වෙන්නෙ.
3. ඈත සිටන් ඉන්න සෙල්ලියේ
මෙයත් ශ්‍රී ලංකාවේ ගණිකාවන් සම්බන්ධව සිදු කරන ලද පර්යේෂණයක් ඇසුරින් නිර්මාණය කරන ලද නවකතාවක්. මාධ්‍යවේදී විපුල සමරනායක තමයි මේ පොත රචනා කරන්නේ. ලීලා නම් ගණිකා වෘත්තියේ නියැලෙන කාන්තාවකගේ චරිතය මුල් කරගෙන ගලා යන මේ කතාව සත්‍ය සිදුවීම් පාදක කොටගෙන ලියන ලද්දක්. ගණිකා වෘත්තිය ගැන වගේම ගණිකාව යයි හඳුන්වනු ලබන මනුෂ්‍යයාගේ ජීවිත ඇතුළාන්තය ගැනත් මේ කෘතියෙන් විමසීමක් කොට තිබෙනවා.
4. මිනිත්තු එකොළහේ කතාව
මේ පොත නම් ඔබ හැමෝම වගේ කියවලා ඇති කියලා අපි හිතනවා. පාවුලෝ කොයියෝ රචනා කරපු මේ කෘතියටත් පාදක වෙන්නේ ගණිකාවක්. බ්‍රසීල තරුණියක් වුණු මරියා, නිළියක් වීමට සිහින දැක්කත් අවසානයේ ඇයට නතරවන්න සිදුවන්නේ ගණිකාවක් විදියටයි. ඉතින් ඇයගේ කතාව හරහා ඔබත් ජීවිතය වෙනත් විදියකට දකින්න උත්සාහ කරාවි මේ පොත කියෙව්වොත්.
5. කොලනියේ කුමරිය
මේ පොතත් පරිවර්තනයක්. මෙය පරිවර්තනය කරන්නේ අපේ රටේ ඉන්න දක්ෂ පරිවර්තිකාවක් වන නිම්මි මුදිතා හේරත්. ලිතුවේනියානු ලේඛිකාවක් වන රුටා සැපටිස්ගේ “Out of the Easy” නම් නවකතාව තමයි නිම්මි මුදිතා විසින් කොලනියේ කුමරිය නමින් පරිවර්තනය කරනු ලබන්නේ. මේ පොතේ ප්‍රබලවම කතාකරන්නේ කොලනියක දුගී දුප්පත් ගණිකාවකගේ දියණියක් ගැන. ඉතින් ඇගේ අම්මා වගේම ඇය දිහාත් මිනිස්සු එකම විදියට බලන නිසා ඇය විඳින අපහසුතා සහ ඇගේ සිහින මේ පොතට පාදක වුණා.
6. රත නොරත රති
මේකත් අපි කලින් කතා කරපු “ශ්‍රී ලංකාවේ ගණිකාවෝ” පොත වගේ පර්යේෂණාත්මක කෘතියක්. අනුර වික්‍රමසිංහ තමයි මේ පොත රචනා කරන්නේ. ලිංගික ශ්‍රමික වෘත්තියෙහි ඇති සූරාකෑම්, සැප, දුක සහ විවිධ සමාජ රෝග ගැන මෙම පොතේ සඳහන්. ඒ වගේම රමණයේ යෙදෙන විවිධ අවස්ථාත් මේ පොතේ සඳහන් නිසා තරමක් රසවත් ශෘංගාරාත්මක හැඟීමක් ඔයාට දැනේවි.
7. අභිසාරිකාශ්‍රම
මේක ඉන්දියානු නවකතාවක පරිවර්තනයක්. ටිකක් වෙනස් විදියේ කතාවක්. මේ පොතට පාදක වෙන්නේ තරමක් කුලවත් ඒත් පුරුෂාධිපත්‍යයෙන් මිරිකුණු ගැහැණියකගෙ ජීවිතයයි. විවාහ ජීවිතයේ විඳින පීඩාවන් නිසා ගෙදරින් පිටමන් වී අවසානයේ ගණිකා වෘත්තීය තෝරගන්න සිදුවන සුමන්ගේ නම් කාන්තාවගේ කතාව රැගත් මේ කෘතිය ඉන්දීය ලේඛක ප්‍රේම්චාන්ද්ගේ ‘සේවා සාදන්’ නම් නවකතාවේ සිංහල පරිවර්තනයක්. මේ පොත සිංහලට පරිවර්තනය කළේ ගුණතිලක මැටියගනේ මහත්මයායි.
මීට අමතරව මේ විෂය සම්බන්ධව ලියවුණු තව පොත් ගොඩක් ඇති. ඉතින් ඒවා ගැනත් අපිට කමෙන්ටුවකින් කියන්න අමතක කරන්න එපා.
ශශින් ප්රබෝද්
Leave a Reply