දැන් ඔය එක එක ෆෝබියා වර්ග තියෙනවනේ ලෝකේ ගත්තහම. ඒ කියන්නේ භීතිකා. කුකුළන්ට තියෙන භීතිකාව, සංවෘත අවකාශ වල ඉන්න තියෙන භීතිකාව වගේ එක එක ඒවා. හැබැයි හෝමොෆෝබියා කියන්නේ ඇත්තටම එහෙම භීතිකාවක්ම කියන්න බෑ. හෝමොෆෝබියා කියන්නේ ඊට වඩා සමරිසි එහෙම නැතිනම් හෝමෝසෙක්ෂුවල් ලිංගික නැඹුරුතාවයෙන් යුතු අය ගැන තියෙන අප්පිරියාව, අකමැත්ත නැතිනම් ඒ අයව පේන්න බැරි කම තමයි. ඒක ඇත්තටම ගේ හෝ ලෙස්බියන් අය වෙනුවෙන් විතරක් නෙවෙයි. LGBTQ ඕනම කෙනෙක් ගැන ඔය අවුල තියෙන්න පුළුවන්.
හෝමොෆෝබියාව නැති අය සහ තියෙන අය වෙනස් වෙන්නේ මෙහෙමයි. අපි කියමු හෝමොෆෝබියාවක් නැති, ඒත් හෝමෝසෙක්ෂුවල් නැති මනුස්සයෙක් කියලා. එයාට තව කෙනෙක් හෝමෝසෙක්ෂුවල් කියලා ගැටළුවක් නෑ. හැබැයි හෝමොෆෝබියාවක් තියෙන කෙනෙක් සෑහෙන්න හෝමෝසෙක්ෂුවල් මිනිස්සුන්ට ද්වේෂසහගත මට්ටමකින් එරෙහි වෙනවා. බොහොම අවිචාරාත්මක විදියට හිතලා ඒ අයව කොන් කරනවා, හිංසා කරනවා. ඇත්තටම හෝමොෆෝබියා කියන්නේ තමන්ගේ ගැටළුවක්. තමන්ට හෝමෝසෙක්ෂුවල් නැඹුරුතාවයක් තිබුණා හෝ නොතිබුණා හෝ, තමන්ගේ හෝමොෆෝබියාව සුවකරගන්න පුළුවන් නම්, වඩාත් සැහැල්ලුවෙන් ජීවත් වෙන්න පුළුවන්.
ඉතින් කොහොමද ඕක සුව කරගන්නේ? ඒක කරන්නේ මෙහෙමයි.
1. ගැටළුවක් තියෙනවා කියන එක අවබෝධ කරගමු
ප්රශ්නයක් විසඳන්න නම් මුලින්ම ප්රශ්නයක් තියෙනවා කියලා අවබෝධ කරගන්න වෙනවනේ. හෝමොෆෝබික් තත්ත්වයන් සම්බන්ධයෙන් වුණත් එහෙම තමයි. මුලින්ම කරන්න ඕන තමන්ට එහෙම ගැටළුවක් තියෙනවා කියලා පිළිගන්න එක. ඇත්තටම කවුරු හරි මනුස්සයෙක්ට තියෙන හෝමොෆෝබියා තත්ත්වය නිසා ගැටළු ඇතිවෙන්නේ බාහිර සමාජයේ ඉන්න සමරිසි මිනිස්සුන්ට විතරක් නෙවෙයි. ඒ මනුස්සයාටමත් තමන්ගේ හෝමොෆෝබියා තත්ත්වය වදයක් වෙන්න තියෙන ඉඩ වැඩියි. ආන්න ඒ නිසා, තමන්ගේ ඒ ගැටළුව මුලින් අවබෝධ කරගන්න එක හොඳයි. ඊට පස්සේ පුළුවන් ඒ ගැටළුවට විසඳුමක් හොයන්න යොමු වෙන්න.
2. “මිනිස්සුන්ව” පිළිගන්න පුරුදු වෙමු
දැන් අපි ඔය ගේද ලෙස්බියන්ද ට්රාන්ස් ද වගේ කතන්දර අතඇරලා වෙන දෙයක් හිතමු. අපි ගමු කවුරුහරි කෙනෙක්, අමුවෙන් මාළු කන්න කැමති. වෙන රටක මනුස්සයෙක් කියලා හිතමු. දැන් අපි අමු මාළු කන්නෙ නෑ. හැබැයි අර මනුස්සයා අමුවෙන් මාළු කෑවා කියලා අපිට අවුලක් තියෙන්න විදියක් නෑ නේද? කොහොමත් අමු මාළු කන එකනේ සුෂී කියලා ෆුඩ් ආට් එකක් වෙන්නේ. ඉතින් අපිට ඇයි බැරි අමු මාළු කන මනුස්සයාවත්, උයලා මාළු කන මනුස්සයාවත් එක වගේම පිළිගන්න? ඕන නම් තව උදාහරණයකට යමු. අපිට සමහර වෙලාවකට, එකම රටේ ජීවත් වෙන, ඒත් වෙනස් ජනවර්ගයකට අයත් වෙන මනුස්සයෙක්ව පිළිගන්න බැහැ. හැබැයි අපිට බැරිද වෙන ජනවර්ගයකට, වෙන ජාතියකට, වෙන ආගමකට අයිති, අපිට වඩා වෙනස් මනුස්සයෙක්ව වුණත්, ‘මනුස්සයෙක්’ විදියට පිළිගන්න?
3. ස්ටීරියෝටයිප් හඳුනාගමු
හෝමොෆෝබික් හැඟීම් වලින් මිදෙන්න කරන්න පුළුවන් තවත් දෙයක් තමයි, LGBTQ කාණ්ඩ වලට අයත් පුද්ගලයන් ගැන සමාජේ තියෙන එක එක විදියේ ඒකාකෘතික කිරීම් වලින් මිදෙන්න උත්සාහ කිරීම. ඒ කියන්නේ සමහරු කියනවා සමරිසි මිනිස්සු නිසා බාලාපරාධ වැඩි වෙනවා කියලා. ඒක ඇත්තද? උත්තරේ නැහැ කියන එක තමයි. බාලඅපරාධ සිද්ධ කරන්නේත් මිනිස්සු. එතකොට ඒකට සමරිසිද විසමරිසිද කියලා භේදයක් නෑ. එහෙම සමරිසි ප්රජාව අතින් වැඩිපුර බාලඅපරාධ සිද්ධ වෙනවා කියලා කියන්න කිසිම පදනමකුත් නැහැ. ඇත්තටම ගත්තොත්, සමරිසි විසමරිසි කණ්ඩායම් වල අනුපාතයට අරගෙන බැලුවත්, සමහර විට වැඩියෙන් බාලඅපචාර සිද්ධ වෙන්නේ විසමරිසි කණ්ඩායමේ ඉන්න අයගෙන් වෙන්න පුළුවන්. ඒකෙන් කියන්නේ, අපි එරෙහි වෙන්න ඕන බාලඅපචාරයන්ට මිසක්, සමරිසි අයට හෝ විසමරිසි අයට නෙවෙයි කියන එක. මේක ඇත්තටම සමලිංගික නැඹුරුතාවයන් තියෙන අය සම්බන්ධයෙන් තියෙන එක ස්ටීරියෝටයිප් එකක්. මෙන්න මේ ස්ටීරියෝටයිප් ගැන තාර්කිකව හිතලා අතඇර ගන්න පුළුවන් වුණොත්, හෝමොෆෝබියාවෙන් මිදෙන්නත් ඒක උදවුවක් වෙයි.
4. හැම වර්ගයක්ම මිනිස්සුන් ආශ්රය කරලා බලමු
දැන් අපි උඩ කිව්වනේ හෝමෝසෙක්ෂුවල් මනුස්සයෝ සම්බන්ධයෙන් තියෙන එක එක ස්ටීරියෝටයිප් කිරීම් ගැන. ඒ වගේම, ගොඩක් වෙලාවට හෝමොෆෝබික් මනුස්සයෙක්ගේ හිතේ LGBTQ කණ්ඩායම් ගැන විවිධාකාරයේ වැරදි මත තියෙනවා. ඉතින් ඒ වැරදි මත වලින් ගැලවෙන්න කරන්න තියෙන හොඳම දේ වෙන්නේ ඒ අයව ආශ්රය කරලා බලන එක. ඒ කියන්නේ අවංකවම ගේ හෝ ලෙස්බියන් හෝ බයි හෝ ට්රාන්ස් හෝ මනුස්සයන්ව සහෝදර මිනිසුන් විදියට, කිසිම අගතිකාරී හැඟීමක් නැතිව ආශ්රය කරලා බලන එක. අන්න එතකොට තමන්ගේ හිතේ තියෙන දුර්මත නැතිවෙලා යයි. ඒක හෝමොෆෝබියාවෙන් ගැලවෙන්න උදවුවක් වෙයි.
5. සහකම්පනය පුරුදු වෙමු
මේක ඕනම කෙනෙක් ප්රගුණ කළ යුතු දෙයක්. ඒ තමයි සහකම්පනය. එම්පති. තව සරලව කිවුවොත්, තවත් මනුස්සයෙක්ගේ හැඟීම් දැනීම් තේරුම් ගන්න සහ බෙදාහදා ගන්න තියෙන හැකියාව. ඇත්තටම මේ සහකම්පනය තියෙන මනුස්සයෙක්ට හොඳ මානව භක්තිකයෙක් වෙන්න පුළුවන්. එහෙම කෙනෙක්ට තව මනුස්සයෙක්ට දැනෙන දේ හොඳින් අවබෝධ කරගන්න පුළුවන්. ආන්න එහෙම සහකම්පනය තමන් තුළ ඇති කරගත්තොත්, අපි කිසිම විටක තව මනුස්සයෙක්ව කොන් කරන්නේ, සමාජයෙන් වෙනස් කියලා හිතන්නේ නෑ. අපි ඇතුළේ සහකම්පනය වර්ධනය කරගන්න පුළුවන් නම්, අපි තව මනුස්සයෙක්ගේ ප්රශ්න දිහා, තව මනුස්සයෙක් අපෙන් වෙනස් වෙන්නේ කොහොමද කියන එක දිහා බොහොම ධනාත්මකව බලයි. ආන්න ඒ නිසා සහකම්පනය හුරු වීමත් හෝමොෆෝබියාවෙන් මිදෙන්න සහායක් වෙයි.
6. තමන්ව ෂුවර් කරගමු
ඇත්තටම තමන් ගැන හොඳ අවබෝධයක් තියෙන, තමන්ගේ පෞරුෂත්වය ගැන බොහොම හොඳ හැඟීමක් තියෙන මිනිස්සු හෝමොෆෝබික් වෙන්න තියෙන ඉඩ අඩුයි කියලා සමහර විශේෂඥයෝ කියනවා. ඒ කියන්නේ, තමන්ගේ පෞරුෂත්වය ගොඩනැගෙන්නේ තමන්ව අවබෝධ කරගැනීම උඩ කියන එක තමයි. උදාහරණයක් විදියට, තමන්ගේ “පිරිමි කම” ගැන හරියට හිතන මිනිස්සු ඉන්නවා නේද? එහෙම තමන්ගේ “පිරිමි කම” ගැන ලෝකෙටම බලහත්කාරෙන් කියන්න උත්සාහ කරන මිනිස්සු ගොඩක් වෙලාවට ඇත්තටම තමන්ගේ ස්ත්රී පුරුෂ ලිංගික සමාජභාවය සම්බන්ධයෙන් අනාරක්ෂිත බවකින් පෙළෙන්න තියෙන ඉඩ වැඩියි. අන්න ඒකම තමයි හෝමොෆෝබියා දක්වාත් දිගුවෙන්න බලන්නේ. අන්න ඒ නිසා, තමන් කවුද කියන එක වටහා ගැනීම, තමන් කවුරු වුනත් තමන්ව තමන් විදියටම පිළිගැනීම සහ තමන් ගැන හොඳ ආත්ම විශ්වාසයක්, ෂුවර් එකක් තියාගැනීම වැදගත් වෙන්නේ අන්න ඒ නිසයි.
7. ගැලපෙන මනෝ වෛද්යවරයෙක් මුණගැහෙමු
ඇත්තටම ෆෝබියා තත්ත්වයන් සමහර ඒවා අපිටම සුව කරගන්න පුළුවන්. හැබැයි තවත් සමහර ෆෝබියා තත්ත්ව සුව කරගන්න අපිට වෘත්තීය ප්රතිකාර අවශ්යයි. ඉතින් උඩ විදියට හිතලා මතලා, දේවල් කරලා හෝමොෆෝබියාව සුවපත් කරගන්න බැරි නම්, තමන්ගේ හෝමොෆෝබියා තත්ත්වය අතිශයින්ම බරපතල නම්, ඊලඟට හොඳම දේ වෙන්නේ හොඳ මනෝවෛද්යවරයෙක් හෝ මනෝ චිකිත්සකවරයෙක් මුණගැහෙන එක. හැබැයි ලංකාව වගේ රටක තාමත් මනෝ චිකිත්සකවරු ඉන්නවා හෝමොෆෝබියාව තියෙන. අන්න ඒ නිසා, එහෙම නැති කෙනෙක්ව මුණගැහෙන එක තමයි හොඳ. එතකොට එහෙම කෙනෙක්ගේ වෘත්තීය ප්රතිකාර වලින් අපිට හෝමොෆෝබියාව අපේ ජීවිතෙන් අයින් කරගන්න හැකියාවක් ලැබෙයි.
Leave a Reply