කේක් එකක් හදනකොට මතුවෙන්න පුළුවන් ගැටළු 5ක් සහ ඒවාට විසඳුම්

කේක් එකක් හදනකොට අපේ අයට සාමාන්‍යයෙන් මතුවෙන ගැටළු කිහිපයක් කතා කරන්න හිතුවා. මේවා නිතරම අපේ අයට එන ගැටළු. කේක් කලාවේ ප්‍රවීණයෙක්ට උනත් යම් යම් අවස්ථාවක මේ වගේ ගැටළු එන්න පුළුවන්. අපි බලමු එහෙම වෙන්න හේතු ටිකක්.

 

1. කේක් සෑදීමට ගන්න අමුද්‍රව්‍ය වල ගුණාත්මකභාවය

කේක් හදන්න ගන්න බේකින් පව්ඩර්, බේකින් සෝඩා හුළං වැදිලා හෝ කල් ඉකුත් වී තියනවනන් අපේ කේක් එක හරියට එන්නෙ නෑ. ඒ වගේම පාන්පිටි හුළං වැදුන පරණ පිටි වුණාමත් කේක් අප්සට් වෙනවා. කාමර උෂ්ණත්වයේ උපරිම විනාඩි 10කට වඩා නොතිබ්බ බටර් ගන්න වග බලාගන්න. පමණට වඩා බටර් දිය වුණොත් බැටර් එක තෙල් ගතියක් එනවා. බිත්තර උනත් කෙලින්ම කේක් බැටර් එකට කඩන්න එපා. මොකද නරක් උන බිත්තර තියෙන්න පුළුවන්. මේ හැමදේම ගුණාත්මකභාවයෙන් තමා කෙරෙන්න ඕනේ. 

 

2. කේක් එක සොෆ්ට් නැතිවීම

බැටර් එකට බිත්තර දාලා බීට් කරනකොට කැදලි වගේ එනවනම් හලාගත් පිටි පොඩ්ඩක් බැටර් එකට දාලා බීට් කරන්න. එතකොට ඒ ගතිය නැතිවෙලා යනවා. ඒ වගේම තෙල් පෑදෙනකල් බීට් කරන්න එපා. ඒක සොෆ්ට්නස් එකට ගොඩක් බලපානවා. ඒ වගේම කේක් එක හදනකොට කිරි ටිකක් දාන්න එතකොට හොඳට සොෆ්ට් වෙනවා. කේක් එක බීට් කරන ප්‍රමාණෙත් මේකට ගොඩක් බලපානවා. බීට්වෙලා මදි උනාම කේක් එක හයි වෙන්න බලනවා. 

 

3. කේක් එක බහින්නෙ ඇයි?

ගොඩක් අයට එන ගැටළුවක් තමා මේක. මේකට හේතු දෙකක් බලපානවා. කේක් එකක් හදලා අවන් එකට දැම්මට පස්සෙ පළවෙනි විනාඩි 30 ඇතුළත අවන් එක අරින්න එපා. කේක් එකට අදා​ළ වෙලාව අවන් එකේ තියලා එළියට ගන්න. අවන් එක නිතර අරිනකොට එළියෙ තියන සිසිල් වාතය ඇතුළට යන නිසා ඇතුළෙ හීට් එක අඩු වෙනවා. ඒකයි ගොඩක්ම හේතු වෙන්නෙ. හැමවෙලේම අවන් එකේ මැද රැක් එකේ කේක් එක දාන්නත් වගබලාගන්න. 

ඒ වගේම හීටර්ස් හරියට සෙට්වෙලා නැතුව හෝ ටයිමර් එක හරියට සෙට් කරලා නැතුව බාගෙට බේක් උනාමත්, ඒ කියන්නෙ මැද අමුවට තියනකොටත් කේක් එක ටික වෙලාවකින් බහිනවා. 

මේ විදියට කේක් එක මැද අමුවෙන අයට කරන්න පුළුවන් තව ක්‍රමයක් තමා කේක් එක විනාඩි 30ක් ගියාම ලා දුඹුරු පාටට බේක්උනාම ෆොයිල් එකක් උඩින් කවර් කරලා වහගන්න එ​ක. මේක පරිස්සමෙන් කරන්න. කේක් එක අවන් එකෙන් එළියට නොගෙන ෆොයිල් කොළයක් ඉක්මණින් කේක් එක උඩින් දාන්න. වටේ තද කරන්න අවශ්‍ය නැහැ. ඒ වගේම කේක් එක බේක් වෙලා ඉවර උනාම කූරක් ගහලා තෙත් ගතියක් නෑ කියලා පේනවානම් විතරක් කේක් එක එළියට ගන්න. තෙත ගතිය තියෙනව නම් ​තව ටිකක් වෙලා බේක් කරන්න. නැත්තන් මැද අමුවට තිබ්බොත් එළියට අරන් ටිකකින් මැදින් බහිනවා. මේ ගැටළු ගොඩක් වෙලාවට ඇති වෙන්නෙ එක එක අවන් වල උෂ්ණත්වය වෙනස් වෙන නිසා.

 

4. කේක් එකක් පැලෙන්නෙ ඇයි?

කේක් එකක් පැලෙන්නත් හේතු කිහිපයක් බලපානවා. එකක් තමා කේක් එකක් බේක් වෙන්න තරම් ඉඩක් ට්‍රේ එකේ නොවු​ණම. සාමාන්‍යයෙන් කිලෝ එකක කේක් බැටර් එකක් බේක් කරන්න ගන්නෙ විෂ්​කම්භය අඟල් 8-9 අතර තියෙන ට්‍රේ එකක්. ඒ වගේම කේක් එකට අපි දාන පාන්පිටි හා බේකින් පව්ඩර් නියමිත ප්‍රමාණයට වඩා වැඩි උනාමත් කේක් පැලෙන්න බලනවා. ඒ වගේම අවන් එකේ හීට් එක ගොඩක් වැඩි උනාම කේක් පැලෙනවා. සාමාන්‍යයෙන් කේක් එකක් බේක් කරන්නෙ සෙල්සියස් අංශක 180 උෂ්ණත්වයට. 

 

5. අයිසින් එක දියාරු වෙන්නෙ ඇයි ?

කේක් එකක් හදාගත්තම ඊළඟට තියෙන මූලිකම දේ අයිසින් කරන එක. ඒකෙදිත් හුඟක් වෙලාවට බටර් අයිසින් එක හරියට හදාගන්න ගොඩක් දෙනෙක්ට බැහැ. සාමාන්‍යයෙන් බටර් අයිසින් හදනකොට 1:3 අනුපාතයට තමා බටර් හා අයිසින් ෂුගර් ගන්න ඕනේ. එහෙම නැතුව බටර් වැඩි උනාමත් අයිසින් එක දියාරු වෙනවා. ඒ වගේම අපි අයිසින් එක හදලා ඒකට කලර්ස් දානකොට ලික්විඩ් කලර්ස් එකතු කළාමත් අයිසින් එකේ දියාරු ගතියක් එනවා. ඒ වගේම අයිසින් එක හදන්න විනාඩි 10කට කලින් තමා බටර් ෆ්‍රිජ් එකෙන් එළියට ගන්න ඕනේ. බටර් දියවෙලා වැඩි උනාමත් අයිසින් එක දියාරු ගතියට එනවා. නිවැරදි රෙසිපි එකක් බලලා අයිසින් එක හදාගන්න. 

 

තනියම කේක් එකක් අයිසින් කරන්න ආසයිද? එහෙනම් මේ අයිසින් රෙසිපි ඔයාලටමයි

කේක් එක රස කරන අයිසින් රෙසිපි – දෙවැනි කොටස

 

 

 

 

මේ වගේ ඔයාලට තවත් මතුවෙන ගැටළු අපිට කමෙන්ට් කරන්න. ඒවට විසඳුම් දෙන්න ලයිෆි අපි සූදානම්.