මෙවර පොත් ප්‍රදර්ශනය තිබුණත් නොතිබුණත් මේ අලුත්ම පොත් 7 ලිස්ට් එකට දාගන්න

සාහිත්‍ය මාසයත් ළඟ ළඟම එනවනේ. තවමත් පොත් ප්‍රදර්ශනය තියනවද නැද්ද කියන එක ගැන නම් නිවැරදි හෝඩුවාවක් නෑ. නමුත් කෝකටත් කියලා ඔයාලා දැන් ඉඳන්ම පොත් ලිස්ට් හදනවා ඇති නේ. ඉතින් මේ අද අපි කතාකරන පොත් හතටත් ඉඩක් ඔයාගෙ පොත් ලිස්ට් එකේ තියාගන්න.

 

1. හින් දොස් මාලේ 

අපේ රටේ ඉන්න විශිෂ්ට ලේඛිකාවන් අතර ඉහළින්ම ඉන්න ලේඛිකාවක් තමයි සේපාලි මායාදුන්නේ කියන්නේ. මේ තමයි ඇගේ අලුත්ම කෘතිය. මෙය මියුසස් ප්‍රකාශනයක්. ඇගේ අනිත් පොත් වගේම මේ පොතත් විශිෂ්ට භාෂා භාවිතයකින් ලියැවුණු විශිෂ්ට පර්යේෂණයක අග්‍රඵලයක්. විශේෂයෙන්ම ඇය මීට පෙර ලියූ මහාසාමි, අස්මිමාන, අන්තාණි කණු වගේම මෙයත් විශිෂ්ට කෘතියක්. මේ කෘතියට පාදක වෙන්නේ නුවර කලාවියෙන් වන්නි හත්පත්තුවට ගිය කුමරියෙක්ගෙ කතාවක්.

 

2. දුවන වට්ටියා හා හිනාවෙන ටිකිරා

ලියනගේ අමරකීර්ති කියන්නේ අපේ රටේ ඉන්න විශිෂ්ට ලේඛකයන් අතරේ ඉහළින්ම ඉන්න ලේඛකයෙක්. කුරුලු හදවත, අහම්බකාරක, අටවක පුත්තු , රතු ඉරි අඳින අත වගේ නවකතා හරහාත්, අර මිහිරි සීනු නාදය, අළු පැහැති ආරංචි, ගෙදර වට සිතියම වගේ විශිෂ්ට කෙටිකතා හරහාත් ඔහු පාඨකයන් රැසක් ආකර්ෂණය කර ගත්තා වගේම සම්මාන, ඇගයුම් රැසකුත් හිමිකරගත්තා. ඉතින් මේ තමයි උණු උණුවෙම ආපු ඔහුගේ නවතම කෙටිකතා කෘතිය. ඉතින් ඔයත් අමරකීර්ති මහතාගේ රසිකයෙක් නම් මේ පොතත් අනිවාර්යයෙන්ම ඔයාගේ ලිස්ට් එකට එකතු කරගන්න.

 

 

3. ගිනි වැදුණු පියාපත්

දැන් අපි කතා කරමු කවි පොතක් ගැන. මේකත් විදර්ශන ප්‍රකාශනයක් විදියට මේ ළඟකදී උණු උණුවෙම ආපු විශිෂ්ට කාව්‍ය සංග්‍රහයක්. මේ කෘතිය රචනා කරන්නේ සඳරැසී සුදුසිංහ. නමින් නම් අපිට තරමක් නුහුරු කිවිඳියක් වුණාට මේ කවි ගොන්න නම් අපිට ගොඩක් සමීප බවක් දනවනවා. යාපනය පුස්තකාලයට ගිනි තබා සිදුකරන ලද ඛේදවාචකය ගැන තමයි මෙහි එන කවි සීයකට අධික කවි ගොන්න ලියවෙන්නේ. ඉතින් නොකියවපු හැමෝටම මේ කාව්‍ය සංග්‍රහයත් කියවන්න ආරාධනා කරනවා. 

 

4. දිවි පිම්ම

වික්ටෝරියා හෝල්ට් කියන්නේ අපේ රටේ පොත් කියවන්නන්ට නම් නුහුරු නුපුරුදු නමක් නෙමෙයි. සත්වෙනි සඳේ රෑ, නිරාශා, ලන්තෑරුම් දහසේ නිවහන, කළු ඕපල් මුදුව, මායාකාරියගේ වෙස්මුහුණ වගේ ඇය ලියූ කෘති ගණනාවක් සිංහලට පරිවර්තනය වුණා. ඉතින් මේ ඇගේ කෘතියක් සිංහලට පරිවර්තනය වුණු තවත් අවස්ථාවක්. මෙය පරිවර්තනය කළේ ඉ. ක ජිනදාස විසින්. මේ කතාව වික්ටෝරියා හෝල්ට්ගේ අනිත් පොත් වලට වඩා වෙනස් වෙන්නේ මේක ලංකාව පාදක කරගත්ත පොතක් නිසයි.

 

5. ආගාධ

ආගාධ කියන්නේ අපේ රටේ ඉන්න අතිශය ජනප්‍රිය ලේඛිකාවක් වන ශාන්ති දිසානායකගේ නවතම කෘතියයි. ඇගේ ගිරිදේවි, වාලුකා, ගිරිකුළ, අග්නි, සංග්‍රාමය වගෙ හැම පොතකම,තිබුණු ඒ කර්කෂ පරිසරය, ඒ අසරණ මිනිස්සුන්ගේ දුක්ඛිත කතාව මේ පොත ඇතුළෙත් ඒ වචන වල හැංගිලා තියෙනවා. ඉතින් ඔයත් ශාන්ති දිසානායක මහත්මියගේ රසිකයෙක් හෝ රසිකාවියක් නම් ආගාධත් පොත් ලැයිස්තුවේ කොනකින් ලියල තියන්න අමතක කරන්න එපා…

 

6. රන්සරණි 

අපේ රටේ ඉන්න විශිෂ්ට වගේම ජ්‍යේෂ්ඨ කතුවරුන් අතරේ ඉහළින්ම රැඳෙන කතුවරයෙක් තමයි ජයකොඩි සෙනෙවිරත්න මහත්මයා. මේ ඔහුගේ නවතම කෘතිය. අක්වැල්ල, නෑනා, රිදී සේල, නෙරලු උයන, සුළිය, තණවිල වත්ත වගේ කෘති හරහා ඔහු අපි හැමෝගෙම සිත් වල වෙනස්ම දැක්මක් සනිටුහන් කළා. ඉතින් ඔහුගේ නවතම කෘතිය වන මෙය කියවන්නත් ඔහු වටා බැඳී ඉන්න පාඨක පිරිසට අපි ආරාධනා කරනවා.

 

7. මම රක්ත වර්ණ නම් වෙමි

ඔර්හාන් පමූක් කියන නම “රත් වරලැති ලිය” කියන විශිෂ්ට කෘතිය කියවපු අයට නම් අමතක වෙන නමක් නම් නෙමෙයි කියලා හොඳටම විශ්වාසයි. මේ පමූක් ගේ තවත් සිංහලට පරිවර්තනය වුණු තුර්කි නවකතාවක්. මෙය පරිවර්තනය කරන්නෙත් රත් වරලැති ලිය පරිවර්තනය කළ නිලූක කදුරුගමුවගේ මහත්මයාමයි. 1590 දශකයේ තුර්කියේ සිදුවෙන කතා දාමයක් තමයි මේ කෘතිය සඳහා පාදක වුණේ. ඉතින් අපිව වෙනම මානයකට ගෙන යන විශිෂ්ට පරිවර්තනයක් තමයි මෙයත්..

 

ඉතින් එහෙනම් මේ පාර පොත් ලිස්ට් එක හදන එක ඔයාට තවත් දැන් ලේසි වෙයි කියලා හිතනවා. මේ වගේ තවත් කෙනෙක්ට රෙකමන්ඩ් කරන්න පුළුවන් වෙනත් අලුත්ම කෘතීන් ගැනත් අපිට කියන්න අමතක කරන්න එපා.

 

ශශින් ප්‍රබෝද්

 

Leave a Reply

Your email address will not be published.