කොරෝනා ඇවිත් මුළු ලෝකෙම ජීවත් වෙන මිනිස්සුන් වැඩිදෙනෙක්ගේ ජීවිත සෑහෙන්න වෙනස් කළා කිවුවොත් වැරදි නැහැ. උදාහරණයක් විදියට කියනවා නම්, ඉස්සර උදේම නැගිටලා බස් වල එල්ලිලා ඔෆිස් ගිහින් වැඩ කරලා, හවස පහට ඕෆ් වෙලා ගෙදර ආපු ගොඩක් අය දැන් වර්කින් ෆ්‍රොම් හෝම් සිස්ටම් එකට හුරුවෙලා තියෙනවා. තවමත් සෑහෙන්න වැඩ කරන කාර්යාල ගෙවල් වල ඉඳන් අන්තර්ජාලය ඔස්සේ, ජාලගත වෙලා වැඩ කරන්න හුරුවෙන්න බැරුව හිටියත්, තවත් ගොඩක් ආයතන -විශේෂයෙන්ම පුද්ගලික අංශයේ- බොහොම සාර්ථකව මේ ගෙදර ඉඳන් වැඩ කරන සිස්ටම් එකට හුරු වෙලා, ඒක වාසියක් කරගෙන තියෙනවා.
හරි, දැන් ඔය ගෙදර ඉඳලා වැඩ කරනවා කියලා, ඉස්සර වගේම මීටින්ස් එහෙම නොතියා ඉන්න බැහැනේ. ඇත්තටම ඔය මීටින්ග්ස් කියන ජාතිය ඔෆිස් එකක සන්නිවේදනයට ඉඳලා පරිපාලනය දක්වා ගොඩක් දේවල් වලට අතිශයින්ම අවශ්‍ය වෙනවා. ආන්න ඒ නිසා තමයි දැන් ඔන්ලයින් මීටින්ග්ස් වලටත් ගොඩක් දෙනෙක් හුරු වෙලා තියෙන්නේ. ඔන්ලයින් මීටින්ග්ස් වලට ඉතින් Microsoft Teams, Google Meet, Zoomවගේ සේවාවන් තමයි ගොඩක් වෙලාවට පාවිච්චි වෙන්නේ.
දැන් ඔය ඔන්ලයින් මීටින්ග්ස් වලදී හැසිරෙන්න ඕනෙ කොහොමද? පිළිපදින්න ඕන සිරිත් විරිත් මොනවද? ආන්න ඒවා තමයි මේ කියලා දෙන්න යන්නේ!
1. හරි වෙලාවට ටිකක් කලින්
දැන් ඔෆිස් එකක තියෙන මීටිමක් නම් සාමාන්‍යයෙන් වෙලාවට පටන් ගන්නකොට අපි දැනගන්නවානේ. එතකොට නැගිටලා යන්න තමයි තියෙන්නේ. හැබැයි ගෙදර ඉඳන් වැඩ කරනකොට වෙන්න පුළුවන් දෙයක් තමයි, අපිට ඔය වෙලාව මිස් වෙන එක. ඒක වෙන්න දෙන්න එපා.
මෙතනදී අත්‍යාවශ්‍ය කාරණයක් තමයි, හරි හැටි කැලැන්ඩර් ඇප් එකක් පාවිච්චි කරන එක. උදාහරණයක් විදියට කිවුවොත්, Microsoft Teams පාවිච්චි කරන කෙනෙක්ට, Microsoft Calander එකම පාවිච්චි කරන්න පුළුවන්. අන්න එතකොට වෙලාවට කලින් නෝටිෆිකේෂන් එනවා මීටිම ගැන කියලා. එතකොට අන්තිම මොහොතේ ටොයිලට් යන්න, කන්න යන්න තියාගන්න එපා. හරි විදිය තමයි මීටින් එක පටන් ගන්න විනාඩි කීපෙකට කලින් මීටිමට ජොයින් වෙන එක.
2. මූණ බෑ නම් බල කරන්න එපා
මෙන්න මේක ටිකක් සංවේදී වෙන්න ඕන කාරණයක්. දැන් අපි කියමු මූණු බලාගෙන කරන මීටින් එකක් කියලා. එතකොට සමහර වෙලාවට සමහර කෙනෙක් කියන්න පුළුවන් මූණ පෙන්නන්න බෑ කියලා. අන්න එතකොට බොස් කෙනෙක් විදියටවත්, එකට වැඩ කරන කෙනෙක් විදියට වත් ඒ මූණ පෙන්නන්න බැරි කෙනාට කැමරා එක ඔන් කරන්න කියලා බල කරන්න යන්න එපා. ඒක අප්සට්. මොකද, ඒ කෙනාට මූණ පෙන්නන්න/කැමරා එක ඔන් කරන්න අකමැති වෙන්න මොකක් හරි හේතුවක් තියෙන්න පුළුවන්.
3. මියුට්-අන්මියුට්-මියුට්
මෙන්න මේක ගොඩක් දෙනෙක් ඔන්ලයින් මීටින්ග්ස් වලදී අමතක කරන දෙයක්. මොකද්ද? සාමාන්‍යයෙන් මීටින් එකක තමන් කතා නොකරනවා නම් මයික් එක මියුට් කරලා තියාගන්න ඕන. එතකොට තමන්ට කතා කරන්න වාරය ආවහම හරි අවශ්‍ය වුනහම හරි මයික් එක අන්මියුට් කරලා කතා කරන්න ඕන. කතා කරලා ඉවර වුණහම ආයෙමත් මියුට් කරන්න ඕන. හැබැයි ගොඩක් දෙනෙක්ට එක්කෝ මයික් එක මියුට් කරන්න අමතක වෙනවා. ඉතින් අවට සද්ද ඔක්කොම මුළු මීටිමටම ඇහෙනවා. ඒක හරිම බාධාවක්. ඒ වගේම තමයි, කතා කරනකොට මයික් එක අන්මියුට් කරන්න අමතක වෙන එක. එතකොට මීටිමේ ඉන්න අය කියන්න ඕන “ඔයාව මියුට් වෙලා” කියලා. ආන්න ඒ නිසා ඔය කරුණු දෙක ගැන හොඳට මතක තියාගන්න.
4. අවට බාධා කිරීම් අවමයෙන්
මේක ඉතින් අමුතුවෙන් කියන්න දෙයක් නෙවෙයිනේ. තමන් මීටින් එකකට එනවා නම්, අවට සද්ද බද්ද, කලබල, කරදර කිරීම් අවම තත්වෙක තියාගන්න මතක තියාගන්න ඕන. ඒ කියන්නේ, ගෙදර අයට කලින්ම දැනුම් දෙන්න ඕන මීටිමක් කියලා. මීටිම යන අතරේ මේසෙට නගින්න එන බල්ලො පූසෝ ගිනි පිග්ලා කූඩුවලට දාලා බැරි නම් බිත්තියට තියලා සෙලෝටේප් ගහලා හරි ඈත් කරලා තියන්න ඕන. තමන් අවට සද්ද බද්ද වළක්වගන්න බැරි නම්, සද්ද බද්ද නැති තැනකට යන්න හරි වෙනත් විකල්පයක් හොයාගන්න හරි ඕන.
5. හරියට ඇඳලා
දැන් වර්කින් ෆ්‍රොම් හෝම් කියලා කියන්නෙ ගෙදර ඉඳලා වැඩ කියන එකනේ. එතකොට මොනවද ඇඳගෙන යන්නේ වැඩ කරන්න? මොනව අඳින්නද, ගෙදර ඉන්න විදියට ඉන්නවා කියලද හිතන්නේ? ආන්න ඒක හොඳ නෑ. මොකද, ඔන්ලයින් මීටින් එකකදී අපි ඔෆිස් කිට් ගහලා ඉඳීම වුවමනා නැති වුණත්, ඩීසන්ට්, පිළිවෙල ඇඳුමක් ඇඳලා ඉන්න ඕන. එහෙම නැතුව ගෙදරනේ ඉන්නෙ කියලා උඩුකය නිරුවතින්, ගල් ෂෝට් ගහගෙන ඇඳේ ඉඳන් කකුල් උඩ දාගෙන එහෙම ඔන්ලයින් මීටින්ග්ස් වලට එන එක හරිම කැතයි.
අනික දවසේ වැඩ පටන් ගන්නකොට ගෙදරට අඳින එකක් වුනත් කමක් නෑ, පිළිවෙල, ගැලපෙන ඇඳුමක් දාගෙන වැඩ පටන් ගන්න එක කාර්යක්ෂමතාවයටත් හොඳයි.
6. මැදින් පැනීම ගැන පරිස්සම් වෙන්න
සාමාන්‍යයෙන් ඔෆිස් එකක මීටින් එකක් තියෙන කොටත් මැදින් පැනලා බාධා කරන උන්දැලා ඉන්නවා නේද? අන්න උන්ව යවන්න ඕන මග්ගොන, සිරිත් විරිත් උගන්නලා ගේන්න. හැබැයි ඔය ඔන්ලයින් මීටින්ග්ස් කරනකොට එහෙම මැදින් පැනලා කතා කරන්න හදන්නේ නැති සිරිත් විරිත් දන්න අයට පවා සමහර වෙලාවට තමන් කතා කිරීම තව කෙනෙක්ගේ කතාව එක්ක ගැටෙන්න පුළුවන්.
උදාහරණයක් විදියට ගත්තොත්, ඔන්න එක්කෙනෙක් කතා කරලා ඉවර වෙනවා. එතකොට අපි දෙයක් කියන්න යනකොට තව කෙනෙකුත් ඒ වෙලේම කතාව පටන් ගන්නවා. අන්න එතකොට කරන්න ඕන ආචාරශීලී දේ තමයි අනික් කෙනාට කතා කරන්න ඉඩ දෙන එක. එතකොට තව විසඳුමක් තියෙනවා, ඒක ඊලඟට කියන්නං.
7. චැට් පැනල්
මේ උඩින් කියපු ඔන්ලයින් මීටින්ග්ස් වලට දැන් කාලේ පාවිච්චි වෙන Microsoft Teams, Google Meet, Zoomවගේ ඕනම සේවාවක මීටින් එකටම විශේෂ වුණු චැට් එකකුත් තියෙනවා. ආන්න ඒ චැට් එකේ අපිට පුළුවන් අවශ්‍ය ලින්ක්ස් දාන්න, කෙනෙක් කතා කරනකොට අපිට එයාට හරි ගෘප් එකට හරි කියන්න ඕන දෙයක් කියන්න වගේ වැඩ වලට. එතකොට අපිට අදහසක් ප්‍රකාශ කරන්න තියෙනවා නම් ඒකත් ඔය චැට් එකේම දන්වන්න පුළුවන්.
දැන් ඔය චැට් එක ඒ විදියට පාවිච්චි කරන්න ඔලුවේ තියාගන්නවා වගේම, ඒ චැට් එකේ මැසේජ් ආවොත් ඒවා බලන්නත් ඔලුවේ තියාගන්න ඕන. දෙකම වැදගත්.
8. කන බොන ගමන්, චූ කරන ගමන්
මේකත් ඉතින් අමුතුවෙන් කියන්න ඕන දෙයක්ද? ඔව්. මොකද, අපේ සමහර අයියලා නංගිලා ඉන්නවා, ඔන්ලයින් මීටින් කෝල් එකේ අපිව පේන්නෙත් නැති වෙන්න කැමරා ඕෆ් කරලනේ, අපිව ඇහෙන්නෙත් නැති වෙන්න මයික් එකත් මියුට් කරලනේ කියලා තමන්ගේ කන බොන වැඩ, චූ බරක් හැදුනහම චූ කරන්න යන වැඩ, මැහුම් ගෙතුම් වැඩ වගේ දහසක් එකක් වැඩ කරන එක. නිකමට හරි අන්මියුට් වුනොත්? කැමරා ඔන් වුනොත්? වෙන්න පුළුවන්. මොකද ඔය හැම එකක්ම ටච් උපාංගනේ. අන්න එතකොට කාඩ් එකත් කුඩු, තමන්ගේ ප්‍රොෆෙෂනල් කමත් කුඩු!
9. ප්‍රොෆෙෂනල් නං ප්‍රොෆෙෂනල්
අවසාන වතාවට ඉතින් කියන්න තියෙන්නේ මේක තමයි. ඇත්තටම මේක ඔය උඩින් කියපු හැමදේකමත් එකතුවක්. අපි ගෙදර ඉඳන් වැඩ කරන්නේ, ඔන්ලයින් තමයි මීටින්ග්ස් තියන්නේ කියලා නෑ, අපේ ප්‍රොෆෙෂනල් කම, නියම වෘත්තිය ගුණගරුක භාවය තියෙන්න ඕන. මීටිමක අවධානයෙන් ඉන්න ඕන. අවශ්‍ය දේවල් ලියා ගන්න ඕන. අවශ්‍ය මොහොතේදී කරුණු දක්වන්න ඕන. කොටින්ම කිවුවොත් ඔන්ලයින් වේවා, ඔෆිස් ගිහින් වේවා කරන මීටිමක උපරිම ප්‍රයෝජනය ගන්න වගේම, මීටිමකට ලබාදිය යුතු උපරිම දායකත්වය දෙන්න ඕන.
අන්න එහෙම කෙනෙක්ට තමයි නියම ප්‍රොෆෙෂනල් මනුස්සයෙක් කියන්නේ!
Leave a Reply