මුදල් ආයෝජනය ගැන දැනගනිමු

අද කාලේ කියන්නෙ කවදාටත් වඩා මුදල් වල වටිනාකම දැනෙන, මුදලටම හැමදේම යටවුන කාලයක්. රැකියාවක්, ව්‍යාපාරයක් කරල මුදල් හම්බකළාටම මදි. ඒ මුදල් ඉතුරු කරන්න, ආයෝජනය කරන්නම ඕන. ඉතුරුවටත් වඩා ආයෝජනය හුඟක් වැදගත්. මොකද ඉතුරු කළාට මුදල් ගොඩ වැඩිවෙන්නෙ නැහැනෙ. 

ඉස්සරට වඩා අදකාලේ තරුණ තරුණියෝ මේ මුදල් සම්බන්ධ කාරණා වලදී ඉස්සරහින් ඉන්නවා. අනාගතේට ආයෝජනය කරනව කියන එක ගැන ඒ අය හුඟක් උනන්දුයි. ඉතින් ඒ නිසාම අපි හිතුව අද මුදල් ආයෝජනය ගැන ටිකක් කතා කරන්න. 

 

1. ආයෝජනය කියන්නෙ මොකක්ද?

ආයෝජනය කියන මාතෘකාව එක එක්කෙනා වෙනස් විදිහට අර්ථකථනය කරන්න පුළුවන්. කෙනෙක් ආයෝජනය කියල කියන්නෙ ලාභයක් බලාපොරොත්තුවෙන් මුදල් යෙදවීමක් කියල කියද්දී, තව කෙනෙකුට ආයෝජනය අනාගතය සඳහා දෙයක් ඉගෙන ගන්න කාලය ශ්‍රමය කැපකිරීමක් වෙන්නත් පුළුවන්. ඔය කොයි විදිහට කිව්වත් ආයෝජනය කියන වචනයට ගැලපෙනවා. හැබැයි අපි අද මේ කතා කරන්නෙ මූල්‍ය ආයෝජනය ගැනයි. මූලිකවම මුදල් ආයෝජනය කියල කියන්නෙ මූල්‍ය සුරක්ෂිතතාවය ඇතිකරගැනීමක්. 

මෙතැනදී වෙන්නෙ මොකක් හරි මූල්‍යමය නිෂ්පාදනයකට, ඒ කිව්වේ කොටස්, දේපළ හෝ ව්‍යාපාර වලට අනාගත ලාභයක් බලාපොරොත්තුවෙන් මුදල් යෙදවීමක්.

 

2. ආයෝජනය සහ ඉතිරිකිරීම අතර වෙනස  

ආයෝජනයකදී වෙන්නෙ අනාගත ලාභයක් බලාපොරොත්තුවෙන් මුදලක් යෙදවීමක්. ඒ කියන්නෙ ඒ මුදල මඟින්ම අපිට ලාභයක් සහ ඒ ගොඩ වැඩි කිරීමක් ඇතිකරලා දෙනවා. නමුත් ඉතුරු කිරීමක් කියන්නෙ අනාගතේ ප්‍රයෝජනයට ගන්න තියෙන මුදලක් වෙන් කරලා අරන් තැබීමක්. එතැනදී ලාභයක් හෝ වර්ධනය වීමක් වෙන්නෙ නැහැ. හැබැයි ඉතිරි කිරීම කියල කියන්නෙ ආයෝජනයේ මුල් පියවර විදිහටත් එක පැත්තකින් හඳුන්වන්න පුළුවන්. මොකද කිව්වොත් පොඩිම මුදලක ඉඳලා ඉතුරු කරන්න පටන් ගන්න පුළුවන් උනාට ආයෝජනයට සැලකිය යුතු මුදලක් අතේ තියෙන්න ඕනනෙ. ඒ නිසා ඉතුරු කරලා එකතු කරගන්න මුදල් අරමුදලක් විදිහට හදාගෙන තමයි ඒවා ආයෝජනයේ යොදවන්න වෙන්නෙ. 

 

3. ආයෝජනයේ වාසි

කලිනුත් කිව්වා වගේ ඉතිරි කිරීමට වඩා හැම අතින්ම වාසි දායක හොඳ තීරණයක් තමයි මුදල් ආයෝජනය කියල කියන්නෙ. මුදල් ආයෝජනයේ වාසි වෙන වෙනම ගත්තොත් මෙන්න මෙහෙමයි.

• උද්ධමනය පරාජය කරන්න පුළුවන් – උද්ධමන​ය කියල හඳුන්වන්නේ සෑම වසරකම සිදුවන සාමාන්‍ය මිල ගණන් ඉහළ යාම සහ සහ ඊට සාපේක්ෂව ඔබේ මිලදී ගැනීමේ හැකියාව අඩුවීම. ඒ කියන්නෙ ඉස්සර රුපියල් 1000ක් වියදම් කරලා ගත්ත බඩු ප්‍රමාණය අද වෙද්දී රු. 1000කින් ගන්න බැහැනෙ අපිට. අද අපේ අතේ තියෙන මුදල් ආයෝජනය නොකර, ඒවාට අනාගත ප්‍රතිලාභයක් නොගෙන, වර්ධනය නොකර නිකන්ම තියාගෙන හිටියොත් වෙන්නෙ කාලය යන්න යන්න ඒ මුදලේ වටිනාකම අඩුවෙන එකයි.සාමන්‍යයෙන් රටක වාර්ෂික උද්ධමන අනුපාතය 3%ක් කියලා ගත්තොත්, ඔබ මුදල් ආයෝජනය කරලා ඒ මුදලට සාමාන්‍යයෙන් 7% වගේ ප්‍රතිලාභයක් ලබනවානම් ලේසියෙන්ම උද්ධමනය පරාජය කරලනේ.

• ආයෝජනය මඟින් ධනය වර්ධනය වෙනවා.
• ආයෝජනය මඟින් විශ්‍රාම සැලසුමක් ඇතිකරගන්න පුළුවන්. විශ්‍රාම දිවිය වැඩ නොකර සුව පහසුවෙන් ගත කරන්න අවශ්‍ය මූල්‍යමය ප්‍රතිලාභ ලබාගන්න පුළුවන්.
• වැටුපක් ගන්නවට වඩා ඉක්මනින් ඔයාගේ මූල්‍යමය අරමුණු ඉටුකරගන්න පුළුවන්.

 

4. ආයෝජනයේ අවාසි

ආයෝජනයේ අවාසිත් නැතුවම නෙමෙයි. ඕනම දෙයක අවදානමක් තියෙනවා වගේ මුදල් ආයෝජනයේත් මේ කියන අවාසි සහගත තත්ත්වයන් ඇතිවෙන්න අවදානම් තියෙන්න පුළුවන්.

• කිසිම ආයෝජනයක් අවදානමෙන් තොර නැහැ. ඉතින් ආයෝජනය කරන මුදල මුළුමනින්ම අපතේ යන්න, අහිමිවෙන්න වගේම පාඩු ඇතිවෙන්නත් ඕනම ආයෝජනයක අවදානමක් තියෙන්න පුළුවන්. 
• ආයෝජනය කරලා ලාභ ලබන්නනම් යම් තරමක දැනුමක් වගේම අවබෝධයක් අවශ්‍යයි. ආවට ගියාට මේ ආයෝජන කරන්න බැහැ.
• කාලය ගතවෙන්න පුළුවන්. ආයෝජනය කළ පමණින්ම අධික ලාභ ලබාගන්න බැහැ.

 

5. ආයෝජන ක​ළ හැකි විවිධ ආකාර  

මුදල් ආයෝජනය කළ හැකි විවිධ ආකාර තියෙනවා. මේ එකකට එකක් අනිකට වඩා හොඳයි කියල කියන්න බැහැ. ඔබට මේ ආයෝජනය සඳහා වෙන් කරන්න පුළුවන් කාලය සහ කැමැත්ත අනුව මොන ආයෝජන ක්‍රමයද වඩා සුදුසු කියන එක තෝරාගන්න පුළුවන්. මේ ඒ ආයෝජන ක්‍රම වලින් වැඩියම ප්‍රසිද්ධ ක්‍රම.

1. කොටස් – කොටස් කියල කියන්නෙ වඩාත්ම ප්‍රසිද්ධ සහ සරලම ආයෝජන ක්‍රමයක්. මෙතැනදී සිදුවෙන්නෙ ප්‍රසිද්ධ සමාගමක කොටස් එයාලා නියම කරන මිලක් යටතේ මිලදී ගැනීම. පසු කාලීනව සමාගමේ කොටස් මිල ඉහළ යාමකදී ඒ කොටස් විකුණලා ලාභයක් ගන්න පුළුවන්. එහෙම නැතත් කොටස් වලට අදාළ ලාභාංශ වාර්ෂිකව ලබාගන්නත් පුළුවන්. හැබැයි කොටස් මිල පහළ යෑමේ අවදානම කොහොමත් තියෙනවා.
2. භාණ්ඩාගාර බිල්පත් හා බැඳුම්කර – මේවා රජයෙන් නිකුත් කරන අදායම් උපයා ගැනීමේ මාර්ගයක්. රජයට අවශ්‍ය අරමුදල් සම්පාදනය කරගන්න රජයෙන් අපෙන් ණයක් ගන්නවා වගේ වැඩක්. රජයේ විශ්වාසය සහ ලැබෙන පොලිය තමයි ප්‍රතිලාභය.
3. පොදු අරමුදල් – ETF, EPF වගේ අරමුදල් ගැනයි මේ කියන්නෙ.
4. තැන්පතු සහතික – Fixed Deposit වගේ තැන්පතු සහතික. යම් නිශ්චිත කාලසීමාවකට පස්සේ ඉහළ පොලියක් එක්ක මුදල ලබාගන්න පුළුවන්.
5. විශ්‍රාම සැලසුම් – දිගුකාලීන ආයෝජන ක්‍රම වලින් තවත් එකක් තමයි මේ. විශ්‍රාම දිවිය කලින් ඉඳලම සැලසුම් කරන්න මුදල් ආයෝජනය කරන්න පුළුවන්.
6. ඉඩකඩම් – භුමියේ පවතින සීමිත ඉඩත් එක්ක ඉඩකඩම් කියන්නෙ ලේසියෙන් මිල පහළ බහින දෙයක් නෙමෙයි. ඒ නිසා මේකත් හොඳ ආයෝජන ක්‍රමයක්.
7. රත්තරන් – රත්තරන් කියන්නෙත් සිඝ්‍රයෙන් මිල ඉහළ යන දෙයක්. හොඳම ආයෝජන ක්‍රමයක්.

 

6. ආයෝජනය පටන් ගන්න ඕනෙ කවදද?

ආයෝජනය කළ යුත්තේ මෙන්න මේ වයසෙදියි කියල නිශ්චිත කාලසීමාවක් නැහැ. කලිනුත් කිව්වා වගේ අතේ තියෙන පුංචිම මුදල හරි ඉස්සෙල්ලම අරමුදලක් විදිහට එකතු කරගන්න. පස්සේ ඒක ආයෝජනයට යොදවන්න පුළුවන්. අඩුම වයසේ ඉඳලම ආයෝජනයට යොමුවෙන එක තමයි හොඳම. උනන්දුව තියෙනවනම් ඉගෙන ගන්න කාලෙ ඉඳලම පොඩ්ඩ පොඩ්ඩ හරි මුදල් ආයෝජනය කරන්න පටන් ගන්න පුළුවන්.

 

7. ආයෝජනය කරන්න කලින් හිතන්න ඕන දේවල්

• ඔබේ මූල්‍ය අරමුණු.
• ඔබේ වයස.
• වර්තමාන මූල්‍ය තත්ත්වය.
• වැය කරන්න පුළුවන් කාලය සහ ශ්‍රමය.
• අවදානම් ගැනීමේ හැකියාව. ඒ කියන්නෙ තියෙන මුදලත් නැති කරගන්න පුළුවන්ද බැරිද කියන එක. මොකද කලින් කිව්ව වගේ ආයෝජනයේ අවදානමකුත් තියෙනවනේ.
• ප්‍රතිලාභ අවශ්‍ය කාලය. දිගු කාලීනද කෙටි කාලීනද කියන එක.