නින්දෙන් ගොරවනවද? එහෙමනම් මේ උපදෙස් පිළිපදින්න

නින්දෙන් ගොරවනවා කියන එක ඇත්තටම සෙල්ලමක් නෙවෙයි. විශේෂයෙන්ම ඒකේ අමාරුව තියෙන්නේ ගොරවන කෙනාට නෙවෙයි, අහල පහල ඉන්න අයට. ලී ඉරන ඩයල් එකක් ඉන්න අහල පහල නිදාගන්න ට්‍රයි කරලා තියෙන අය දන්නවා ඒකේ තියෙන අමාරුව. හොඳට ගොරවන හාදයෙක් ඉන්න අහලක නිදාගන්න එකම පුදුම කරුමයක්. හැබැයි එතකොට ගොරවන හාදයා එහෙම අමාරුවක් දන්නෙ නැතිය, මිනිහ සැපසේ නිදිය කියලද හිතන්නේ? අපොයි නෑ. නිදාගෙන ඉන්නකොට ගොරවන හාදයා දන්නෙ නෑ තමන් ගොරවනවා කියලවත්. හැබැයි ලී ඉරන ලෙවල් එකෙන් දීර්ඝ කාලයක් නින්දෙන් ගොරවනවා කියන්නේ සරල දෙයක් නෙවෙයි. ඒක සෞඛ්‍යයට බොහොම අහිතකර වෙන්න පුළුවන් දෙයක්.

 

හරි, එහෙමනම් කරන්න තියෙන්නේ තමන්ගේත් අනුන්ගේත් හිත සුව පිණිස නින්දෙන් ගොරවන එක නතර කරගන්න එකනේ. ඒකට අමාරුම අවස්ථාවකදී නම් වෛද්‍ය ප්‍රතිකාර අවශ්‍ය වෙන්න පුළුවන්. හැබැයි එතනට යන්න කලින් කරන්න පුළුවන් දේවල් ටිකක් තියෙනවා, ආන්න ඒවා කරලා බලන්න ඕන. මේ කියන්න යන්නේ, ගොරවන එක නවත්තගන්න, ගොඩාක් දුරට සාර්ථක වෙන සරල දේවල් කීපයක්.

 

1. වැඩි සයිස් එකෙන් අඩු සයිස් එකට එන්න

මේක මුලින්ම ගන්නේ හේතුවක් ඇතුව. නිකමට හරි හිතලා බැලුවොත් තේරෙයි, සාමාන්‍යයෙන් මහත දෙහෙත මනුස්සයෝ, ඒ කියන්නේ ස්ථුල මනුස්සයෝ වැඩිපුර ගොරෝනවා කියලා. ඒ කිව්වේ කෙට්ටු මිනිස්සු ගොරවන්නෙ නෑ කියල නෙවෙයි, හැබැයි ඇඟ මහත වෙනකොට නින්දෙන් ගොරවන්න වැඩි ඉඩක් තියෙනවා කියලා. ඒ වගේම එහෙම ගොරවන, මහත මනුස්සයෙක් තමන්ගේ ඇඟ අඩු කරගන්න කොට, ගොඩාක් දුරට ඔය ගොරෝන ප්‍රශ්නේ ඉවර වෙනවා. ආන්න ඒ නිසා අද ඉඳලම ඩයට් කරන්න පටන් ගමු, ජිම් එකකට හරි දුවන්න හරි වෙන ඒ වගේ ස්පෝට්ස්මීට් වැඩක් කරන්න පටන් ගමු. ඊට කලින් වෛද්‍යවරයාව හරි, පෝෂණවේදියෙක්ව හරි මුණගැහිලා, තමන්ගේ ඇඟේ විදියට හරියන නියම ඩයට් ප්ලෑන් එකකුත් හදාගමු.

 

2. පැත්තට සැතපෙමු

සාමාන්‍යයෙන් අපි නිදාගන්න කොට පැත්තටත් නිදාගන්නවා තමයි. හැබැයි ඉතින් ගොඩක් දෙනෙක්ට එක එක විදියේ නිදාගන්න ක්‍රම තියෙනවා. සමහර එව්වා දැක්කහම අන්දරේ මැරුණු හැටි මතක් වෙන ගාණයි. හැබැයි ඉතින් දණගහගෙන නිදාගත්තත් කමක් නෑ, තමන්ට ගොරවන පුරුද්ද තියෙනවා නම්, ඒකට හේතුව නිදාගන්න ක්‍රමය වෙන්නත් ඉඩක් තියෙනවා. විශේෂයෙන්ම ඔය උඩුබැලි අතට නිදාගන්නකොට එහෙම සමහර වෙලාවට දිව උගුර පැත්තට ඇදිලා ශ්වසන මාර්ගය ටිකක් බ්ලොක් වෙන්න පුළුවන්. හැබැයි පැත්තට නිදාගන්නකොට තමන්ට පහසුවෙන් ආශ්වාස ප්‍රශ්වාස කරන්න පුළුවන් විදියට ශ්වසන මාර්ගය ඇරිලා තියෙනවා. ඒ නිසා තමන්ගේ ඇලයකට නිදාගන්න හුරුවෙන එකත් හොඳයි.

 

ඒ වගේම නිදාගන්න කොට ඇඳේ පෘෂ්ටයේ තලයෙන් පොඩ්ඩක් උඩට ඔළුව ඉස්සිල තියෙන විදියේ සුවපහසු කොට්ටයක් පාවිච්චි කිරීමත් හොඳයි.

 

3. දුම්බීම නවතමු

දැන් මේ කියන්නේ දුම්බොන හැමෝම නින්දෙන් ගොරවනවා කියලා නෙවෙයි. ඉඳලා හිටලා සිගරට්ටෙකක් ගහන මනුස්සයෙක් එදාට ගොරවනවා කියලත් නෙවෙයි. හැබැයි කෙනෙක් පුරුද්දක් විදියට දුම් බොනවා නම්, එයා නින්දෙන් ගොරවනවාත් නම්, ඒ නින්දෙන් ගෙරවීම තවත් නරක අතට හරවන පුරුද්දක් වෙන්න පුළුවන් දුම් බීම. කොහොමත් ඕනවට වැඩි දේවල් ඕනම නැහැනේ. අන්න ඒ නිසා දුම්බීමේ පුරුද්දෙන් මිදෙන එකත් නින්දෙන් ගොරවන එක නවත්තගන්න හොඳයි.

 

අනික දුම්බීම අතරෙම කියන්න ඕන, නිදාගන්න කලින් දෙකක් දාගන්න එකත් පුරුද්දක් විදියට කරනවා නම්, ඒකත් නින්දෙන් ගෙරවීම වැඩිවෙන්න හේතුවක් වෙන්න පුළුවන්ලු. අන්න ඒකත් ඒ නිසා නවත්තගමු.

 

4. ඇති වෙන්න නිදාගමු

දන්නවද ප්‍රමාණවත් නින්දක් නැති එකත් ගොරවන්න හේතුවක් කියලා? ඇත්තටම ඒක නින්දෙන් ගොරවන්න හේතුවක් තමයි. ඒ කියන්නේ, සාමාන්‍යයෙන් වෛද්‍යවරු නිර්දේශ කරනවා සෞඛ්‍ය සම්පන්න ජීවිතයක් ගත කරන්න අවශ්‍ය මනුස්සයෙක් පැය හතක් අටක් වගේ කාලයක් නිදාගන්න ඕන කියලා. අඩුම තරමින් පැය හයක කාලයක්වත් නින්දට ගත කරන්න ඕන. ඉඳලා හිටලා අතිශයින් කලාතුරකින් නයිටක් ගැහුවට කමක් නෑ, හැබැයි පුරුද්දක් විදියට නිදි මරනවා නං, ඒක පුරුද්දට ගිහිල්ලා පැය දෙක තුනකට වඩා නිදාගන්න බැරි නං, නින්දෙන් ගොරවන එකත් ඔය නිදි නැති පුරුද්දත් එක්ක එන්න හොඳටම ඉඩ තියෙනවා. 

 

5. නින්දට කලින් ගන්න වේදනා නාශක

මේකත් නින්දෙන් ගෙරවීම ඇති කරන්න හෝ නින්දෙන් ගෙරවීම බරපතල කරන්න පුළුවන් හේතුවක් කියලා වෛද්‍යවරු කියනවා. ඒ කියන්නේ සෙඩෙටිව්ස් නැතිනම් වේදනා නාශක නින්දට කලින් ගන්න එක. මෙතනදී සමහරු තමන්ගේ වුවමනාවට හිතේ ලෙඩවලටත් වේදනා නාශක ගන්නවනේ. ඒක වහාම නවත්තන්න ඕන. සමහරු නම් වෛද්‍ය උපදෙස් පිට වේදනා නාශක ගන්නවා. අන්න ඒක පුළුවන් තරම් නින්දට කලින් ගන්න පුළුවන් ක්‍රමයක් හදාගන්න වෙනවා. එහෙම බැරි නම්, තමන්ගේ වෛද්‍යවරයාත් එක්ක සාකච්ඡා කරලා, තමන්ගේ ගෙරවීමේ ප්‍රශ්නේ ගැනත් කියලා වෙනත් විකල්පයක් හදාගන්න පුළුවන්.

 

6. ක්‍රොනික් ඇලර්ජීස්

ඔව්, මේ කියන්නේ ඇලජික් සීන් ගැන තමයි. අපි සමහරුන්ට තියෙනවා ඇලර්ජීස්. එහෙම නැතිනම් අපි ලේසියෙන් කියන විදියට ඇලජික්. ඔය ඇලර්ජි එකකදී වෙන්න පුළුවන් දේ තමයි අපි කටින් හුස්ම ගන්න පෙළඹෙන එක. එතකොට දිගින් දිගටම ගණන් ගන්නෙ නැතුව පවතින සරල ඇලර්ජි එකකදී වුනත් ඔය කටින් හුස්ම ගන්න එක වැඩි වෙලා, වැඩි වෙලා ඒක නින්දෙන් ගෙරවීමක් බවට පරිවර්තනය වෙන්න පුළුවන්. ආන්න ඒ වගේ අවස්ථාවකදී වුනත් කරන්න තියෙන්නේ වෛද්‍යවරයෙක්ව මුණගැහෙන එක. එතකොට එයා අපිව පරීක්ෂා කරලා, අපේ ඇලර්ජීස් ගැනත් තක්සේරුවක් කරලා ඒකට බෙහෙත් දෙයි. මේක ලොකු දෙයක් නෙවෙයි, ගොඩක් වෙලාවට සරල, ඕනම ෆාමසියකින් ගන්න පුළුවන් බෙහෙත් කෝස් එකක්. 

 

7. මවුත් පීස් එකක් දාගමු

ඔය එකකින් වත් නින්දෙන් ගොරවන එක නතර වෙන්නෙ නැතිනම් ඩොක්ටර් කෙනෙක් මුණගැහෙන්න වෙනවා. ඒ කියන්නේ නින්ද සම්බන්ධ ස්පෙෂලිස්ට් කෙනෙක්. හැබැයි ලොකු සීන් වලට යන්න කලින් ඩොක්ටර් වුනත් කියයි සරලව ගොරවන එක නවත්තගන්න ක්‍රමයක්. ඔය මවුත් පීස් එකක් කියලා කියන්න පුළුවන් දත් එක්ක ගාණට ෆිට් වෙන්න කටට දාන්න පුළුවන් ගැජමැටික් එක ඒ වගේ සරල ක්‍රමයක්. හැබැයි ඉතින් වෛද්‍ය නිර්දේශය මත තමයි මේක පාවිච්චි කරන්න ඕන. ඒක පාවිච්චි කරනකොට ගොඩාක් දුරට නින්දෙන් ගොරවන එක සෑහෙන්න අඩු වෙනවා.

 

එහෙමත් හරියන්නේ නැති ලෙවල් එකක් නම්, ඩොක්ටර් කියයි එතනින් එහාට යන පුළුවන් වෛද්‍ය ප්‍රතිකර්ම මොනවද කියලා.

 

 

Leave a Reply

Your email address will not be published.