මේ ගෙවෙන්නේ පොත් වසන්තයේ මාසය. විශේෂයෙන්ම සැප්තැම්බර් මාසේ පොත් ගැන විශේෂ උනන්දුවක් ඇති වෙන්න ගොඩක්ම බලපාන්නේ කොළඹ BMICH එකේ පැවැත්වෙන ජාත්‍යන්තර පොත් ප්‍රදර්ශනය. මේකෙන් පොත් ගන්න, පොත් බලන්න වගේම පොත් පෙරළන්නත් සෑහෙන ජනකායක් BMICH එකට ඇදිලා එනවා කියන එක වැරදි නෑ. දැන් මෙතනින් පොත් ගන්න එන අයට පුළුවන් ස්ටෝල් එකෙන් ස්ටෝල් එකට ගිහිල්ලා පොත් ගන්නත්. එහෙම නැතිනම් පුළුවන් කලින් තමන්ට ගන්න ඕන පොත් ලිස්ට් එකක් හදාගෙන ගිහිල්ලා ඒ පොත් ටික අරගෙන එන්නත්. මේ ලිස්ට් හදාගන්න එකේ වැදගත්කම වෙන්නේ, දැන් වෙනකොට විශේෂයෙන්ම පොත් ප්‍රදර්ශනයේදී එළිදැක්වෙන පොත් තියෙන නිසා. ඉතින් පොත් කියවන පාඨක සහෘදයන්ට අපි උදවුවක් කරන්න යන්නේ ආන්න එහෙම පොත් ලැයිස්තුවට ඇතුළත් කරගන්නම ඕන පොත් කීපයක් ගැන විස්තර කියලා. මෙතන ස්වතන්ත්‍ර නිර්මාණ වගේම පරිවර්තන කෘති එහෙමත් තියෙනවා කියලා මතක් කරන්න ඕන!
මෙතනින් සමහර පොත් මේ මාසේ සහ ඊට කලින් මාසේ නිකුත් වෙලා හමාරයි. ඒත් පොත් ප්‍රදර්ශනයෙන්ම ඒවා ගන්න එකත් හොඳයිනේ!
1. කුමර කොබෙයි – ෂමෙල් ජයකොඩි
ෂමෙල් ජයකොඩිගේ නමත් එක්කම අපිට මතක් වෙන නවකථා කීපයක් තියෙනවා. ඒවායින් ලඟම ඒවා තමයි ප්‍රංශ පෙම්වතා, ඇමරිකා, වීනස්ගේ උපත සහ පියාපත් ලත් දෝණිය. හැබැයි මේ ඇගේ නවකථාවන්ගෙන් කීපයක් පමණයි. කුමර කොබෙයි කියන්නේ ෂමෙල්ගේ නවතම නවකථාව. මේ වනවිට එළිදැක්විලා තිබුණත්, ගොඩක් දෙනෙක්ට මේක බුක් ෆෙයාර් එකෙන් ගන්න එක තමයි පහසු වෙන්නේ. කුමර කොබෙයි නවකථාවට පාදක වෙලා තියෙන්නේ ඇමරිකාවේ ජීවත් වෙන අවිවාහක ශ්‍රී ලාංකීය තරුණියකගේ මානසික විවරණයක් කියලා තමයි කියවෙන්නේ. ඒ වගේම මහාද්වීපයක ජීවත් වෙන මිනිස්සුන්ගේ ජීවිත, සංස්කෘතීන් කිහිපයක ඝට්ටන, නූතන ස්ත්‍රියගේ භූමිකාව වගේ පැති කිහිපයකටම මේ නවකථාව දිවෙනවා කියලත් කියවෙනවා.
ප්‍රකාශනය: විදර්ශන
2. මතක මිය ඇදෙන සඳ – අම්බලවානර් සිවානන්දන් (ප්‍රතිරචනය: හෂිත අබේවර්දන)
අම්බලවානර් සිවානන්දන් කියන්නේ ලංකාවේ පොදු පාඨකයාට ඒ තරම් හුරු නමක් නෙවෙයි. හැබැයි ඉංග්‍රීසි බසින් කියවන පාඨකයින්ට, අම්බලවානර් සිවානන්දන් කියන නම කිසිසේත්ම නුහුරු නුපුරුදු නැහැ. ශ්‍රී ලාංකික දමිළ ලේඛකයෙකු වුණු අම්බලවානර් සිවානන්දන් ලියපු When memories dies කියන පොතේ ප්‍රතිරචනයක් විදියට තමයි මතක මිය ඇදෙන සඳ එලිදැක්වෙන්නේ. ප්‍රතිරචනය, බුහුටි සාහිත්‍යකරුවෙකු වන හෂිත අබේවර්දන අතින්. මේ 1983 ගණන් වල සිට 1980 ගණන් වල මැදක් වෙනතුරු දිවෙන පරම්පරා තුනක ආදර කතාවක් විදියට තමයි හඳුන්වලා දීලා තියෙන්නේ.
ප්‍රකාශනය: සයුර
3. ම’සිත් හසර එක්තරා නුහුරුවක – ඔර්හාන් පමුක් (පරි: ගංගා නිරෝෂණී සුදුවැලිකන්ද)
තුර්කි ජාතික ඔර්හාන් පමුක් කියන්නේ, 2006 අවුරුද්දේ නොබෙල් ත්‍යාගයද හිමිකරගත් අති විශිෂ්ට ලේඛකයෙක්. මේ ලේඛකයාගේ පොත් භාෂා හැටතුනකට පරිවර්තනය වෙලා, පිටපත් මිලියන දහතුනකටත් වැඩියෙන් විකිණිලා තියෙනවා. ඉතින් අන්න ඒ ඔර්හාන් පමුක්ගේ A strangeness in my mind කියන පොත තමයි ලංකාවේ විශිෂ්ට පරිවර්තිකාවක් වෙන ගංගා සුදුවැලිකන්ද අතින් පරිවර්තනය වෙලා බුක් ෆෙයාර් එකේදී නිකුත් වෙන්නේ. මේ, ඉස්තාන්බුක් නගරයේ බෝසා සහ යෝගට් වෙළෙන්දෙක් වෙන මෙව්ලුන් කරතස්ගේ ජීවිතය සහ ඔහුගේ දහවල් සිහින වල කතන්දරයයි.
ප්‍රකාශනය: විදර්ශන
4. ඩේමියන් – හර්මන් හෙස (පරි: මහින්ද පතිරණ)
1946 දී නොබෙල් ත්‍යාගයෙනුත් පිදුම් ලබපු විශිෂ්ට ජර්මානු ලේඛකයෙක් වෙන හර්මන් හෙස, ලංකාවේ පාඨකයා හඳුනාගන්නේ ‘සිද්ධාර්ථ‘ කියන කෘතියෙන්. මේ හර්මන් හෙසගේ තවත් විශේෂ කෘතියක් තමයි ඩේමියන්. මේක පරිවර්තනය කරන්නේ මහින්ද පතිරණයන් විසින්. ඩේමියන් කියන්නේ අපි දන්න හොඳ සහ නරක කියන ද්වන්ධ චරණයෙන් ඔබ්බට යාමට දරන ප්‍රයත්නයකි කියලා තමයි මේ පොත ගැන Kbooks.lk අඩවියේ තියෙන හැඳින්වීමේ සඳහන් කෙරෙන්නේ. ඔහු තමන්ව සොයා යන ගමනේදී තැබූ බරපතලම පියවරක් විදියට මේ පොත සඳහන් කෙරෙනවා. ඩේමියන් ඇත්තටම ප්‍රශ්න කරන්නේ, අභියෝගයට ලක් කරන්නේ නූතන ක්‍රිස්තියානි වටිනාකම් පද්ධතිය, ඒ වගේම හොඳ හෝ නරක සහ අඳුර සහ ආලෝකය විදියට කෘත්‍රිමව බෙදා වෙන් කරලා දක්වලා තියෙන ලෝකය කියලත් සඳහන් වෙනවා. සිද්ධාර්ථ වගේම ඩේමියන් කියන්නෙත් දාර්ශනික මුහුණුවරකින් යුක්ත කෘතියක් කියලා හඳුන්වන්නට පුළුවන්.
ප්‍රකාශනය : විදර්ශන
5. විවාහකයාගේ ප්‍රේම ප්‍රාප්තිය – ජයන්ත කහටපිටිය
ජයන්ත කහටපිටිය කියන්නේ කෘතහස්ත කවියෙක් සහ කතාකරුවෙක් කියලා සමාජ ජාලා වල සැරිසරන අය හොඳින්ම දන්නවා. මේ කවියාගේ කාව්‍ය සංග්‍රහයක් මෑතකදී එලි දුටුවා, ‘විවාහකයාගේ ප්‍රේම ප්‍රාප්තිය’ කියන නමෙන්. විවාහකයාගේ ප්‍රේම ප්‍රාප්තිය කියන්නේ, ජීවිතයේ අති සියුම් කලාපයන් තුල නොස්ටැල්ජියානු පින්සලකින් අඳින සිතුවම් වලින් ගහණ කාව්‍ය එකතුවක් විදියට තමයි කපිල එම්. ගමගේ සටහන් කර තිබෙන්නේ. ලංකාවේ පොදු විවාහකයා සම්බන්ධයෙන් දකින්න තියෙන ලක්ෂණ කුලුගැන්වීමෙන් නිර්මාණය වෙන මේ කහටපිටියගේ විවාහකයා, තමන්ගේ විවාහ ජීවිතයේ තියෙන සීමා මායිම් යම් ප්‍රමාණයකට හෝ බිඳ හෙලා දමලා ප්‍රේමය අත්පත් කරගැනීම තමයි මේ පොතේ කියවන්න තියෙන්නේ. හැබැයි මේ ප්‍රේමය කියලා හඳුන්වන්නේ ස්ත්‍රී පුරුෂ ප්‍රේමය ගැනම නෙවෙයි. අපිට තේරෙන විදියට නම් විවාහකයාගේ ජීවිත ප්‍රේමය ගැන තමයි මේ කථා කරන්නේ.
ප්‍රකාශනය: අහස
6. ලෝටස් – සෞම්‍ය සඳරුවන් ලියනගේ
සෞම්‍ය සඳරුවන් ලියනගේ කියන්නේ ප්‍රතිභාපූර්ණ කවියෙක් විදියට සාහිත්‍ය ලෝකයේ නමක් දිනාගත් කෙනෙක්. සෞම්‍යගේ හැටේවත්තේ මග්දලේනා පොත තාමත් හැමෝටම මතක තියෙනවා. මේ කවියා නවකතාකරණයට පිවිසිලා තියෙනවා, ‘ලෝටස්‘ කියන කුලුඳුල් නිර්මාණය හරහා. ඇත්තටම මේ කෘතිය මොන වගේ එකක්ද කියලා තාමත් අපිට තීරණය කරන්නත් අමාරුයි. මොකද මේ ගැන තාමත් විචාරයක් හෝ සටහනක් ලියවිලා නැහැ. ඒත් පොතේ උපුටනයකින් අපිට කෙනෙක්ට මේ නවකථාව මිලදී ගන්න තියෙන ආසාව කුළුගන්වන්න පුළුවන්.
‘ගොඩක් අය තරු ගැන කතා කළාට කවුරුත් කතා කරන්නෙ නෑ ඒ තරු පිටිපස්සෙ තියෙන අඳුර ගැන. මතක තියාගන්න, තරුවකට දිලිසෙන්න බෑ කවදාවත් ඒ කළුවර නැතුව, දීප්තිය වැඩිවෙන තරමටම කළුවරත් වැඩි වෙනව. ඒ කියන්නෙ තරුවකට සිද්ධවෙනවා කොන්දේසි විරහිතව ඒ ගන අන්ධකාරය ඉවසන්න…‘
ප්‍රකාශනය : සහෘද
7. ශ්‍රී ස්කන්ධ – සචී පනාවල
ස්කන්ධ නැතිනම් කතරගම දෙවියන් කියන්නේ අපිට හුරුපුරුදු ශ්‍රී ලාංකික දෙවියෙක් විදියට අපි සැලකුවත්, ඇත්තටම ස්කන්ධ නැතිනම් මුරුගන් නැතිනම් කාර්තිකේය කියන්නේ හින්දු දේව පෙළැන්තියේ එන යුද්ධයට අධිපති දෙවියන්. මහදෙවි ශිවගේ දරුවෙක්. ඉතින් මේ හින්දු දේව දහමේ එන ස්කන්ධගේ උත්පත්තිය, ශිව-පාර්වතී සුසං‍යෝගය, ගණේෂ්-ස්කන්ධ දෙසොහොයුරන්ගේ කථා ආදී දේව පවුල් කථාන්දර හැම එකක්ම ඇතුලත් කොට ලියලා තියෙන ස්කන්ධ පුරාණය තමයි ස්කන්ධ විදියට එළිදකින්නේ. සචී පනාවල විසින් රචනා කරලා තියෙන මේ ස්කන්ධ කෘතිය, හින්දු දේව පුරාණය සම්බන්ධයෙන් උනන්දුවක් දක්වන ඕනම කෙනෙක්ට වටිනා කියන අත් පොතක් වෙයි කියලා කියන්න පුළුවන්.
ප්‍රකාශනය: සයුර
Leave a Reply