අනවශ්‍ය බර කියලා කියනවා නම් අවශ්‍ය වෙන බරකුත් තියෙන්න එපැයි. BMI අගය ගාණට සමබර කරගෙන ගියාම ඒ අවශ්‍ය බර ලැබෙනවා. අනවශ්‍ය බර කියන කරදරය කාන්තාවන්ට ශාරීරිකව වගේ ම මානසික වශයෙන් ම අවුලක් වෙන්න පුළුවන් දෙයක්. ඒ නිසා ඒ බර අඩු කරගන්න එක එක දේවල් අත්හදා බලන්න පුරුදු වෙලා තියනවා. කම්මැලිකම එක්ක මොකක්වත් කරන්න බැරි වුණත් එක එක පෙති වර්ග හරි බීලා මහත අඩු කරන්න කට්ටිය පෙළඹෙනවා. ඒත් ඇත්තට ම කිසිම අතුරු ආබාධයක් නැතුව මහත නැති කරගන්න සුපිරි ව්‍යායාම විධි කීපයක් තියෙනවා අත්හදා බලනවා නම්.
1. Lunges
කකුල් දෙක විශේෂයෙන් ම කලවා පෙදෙසේ තියන මේදය නිසා සෑහෙන ලොකු අර්බුදයකට කාන්තාවන් මුහුණ දෙනවා. තමන්ට හරියන ඩෙනිමක් නැත්තම් සායක් ගන්න ගියොත් අපහසුතාවට පත් වෙනවා. ඉන හරි ගානට තිබුණත් පහළට යන්න ශරීර ප්‍රමාණය වැඩි නිසා කිටි කිටියේ ඇඳුම් ඇඳන් ඉන්න වෙනවා. මේ ව්‍යායාමය කරන්න පුරුදු වීමෙන් කකුල්වලට හොඳ ව්‍යායාමයක් ලැබෙනවා. අත් දෙක සවි ශක්තියට ඉන දෙපැත්තේ ඉස්සෙල්ලා ම තියාගන්නවා. ඊට පස්සේ දකුණු කකුල පෙරට ගෙනත් අංශක 90කට එය නවාගන්නවා. පිටුපසින් තියන කකුල දණහිස ගෑවී නොගෑවී තියෙන්න නවා ගන්නවා. එතැනදීත් අංශක 90 පවත්වාගත යුතුයි. ඊට පස්සේ එක කකුලකට පහළොස් වතාවක් වශයෙන් අවස්ථා තුනක් ඒ කියන්නේ හතළිස් පස් වතාවක් කකුල් ඒ ඉරියව්වෙන් ඉදිරිපසට නවලා ආපහු මුල් ඉරියව්වට එන්න ඕනි. එක කකුලකට කරලා අහවර වෙලා අනෙක් කකුලටත් ඒ විදියට ම ව්‍යායාමය දෙන්න ඕනි. මේ සුදු අක්කත් එක්ක එකතු වෙලා කරන්න බලන්න
2. Burpees
පපුවේ ඉඳන් කකුල් වෙනකන්ම හොඳ ව්‍යායාමයක් ලබාගන්න පුළුවන්. උරහිස් පරතරයෙන් කකුල් දෙක තියාගන්න ඊට පස්සේ නටනකොට මැණ්ඩියට ඉන්නවා වගේ නැවෙන්න. හැබැයි පාද කෙලින් අතට තියෙන්න අවශ්‍යයි. ඊට පස්සේ අත්ල හොඳින් බිම ගෑවෙන්න බිම තියල අත් දෙකට බර දීලා කෙලින් ම කකුල් දෙක දිග හැරලා පාදයේ ඇඟිලිවලින් රැඳෙන්න උත්සහ කරන්න. ආපහු අත්ලට බර දීලා මැණ්ඩියට හිටපු විදියට ඇවිත් ඉක්මනින් කෙලින් වෙලා හොඳින් අත් විදහලා උඩ පනින්න. මේ ක්‍රියාදාමය දිගට ම ඉතා ඉක්මනින් වෙන්න ඕනි. විනාඩියකට බර්පීස් විස්සක් විතර කරන්න පුළුවන් නම් ගොඩ
3. Squats
කලින් ව්‍යායාමයේ සඳහන් කරපු මැණ්ඩි පොසිෂන් එකට සුද්දා කියන්නේ මේ නම. උරහිසේ පළලින් කකුල් දෙක තියාගෙන කොන්ද නවන්නේ නැතුව මූණ කෙලින් තියාන අත් දෙක ඉදිරියට දික් කරලා සමාන්තර ව පහළට එන්න. නැවතත් උඩට යන්න. මේක වාර 15ක් බැගින් තුන් පාරක් කරා ම හොඳ ගණන්. ශරීරයේ පහළ කොටස් සියල්ලට හොඳට පත්තියන්.
4. Double Jump
මේක squats එක්ක lunges එකට පෑහුණු ව්‍යායාමයක්. හෘදය වස්තුව ෆෙරාරියකට ගොඩ වුණ චීටෙක් වගේ වේගයෙන් ගැහෙන සහ ඇඟට දැනෙන ව්‍යායාමයක්. අත් දෙක බොක්සින් ගහනකොට තියාගෙන ඉන්න හුරුවට තියාගෙන squats කරනවා වගේ නැවෙන්න. ඊට පස්සේ උඩ පනින ගමන් lunges ඉරියව්වට මාරු වෙන්න. මේක දිගට ම කකුල් දෙක මාරු කරමින් කරන්න. තත්පර 45ක කෑලි දෙකක් එක දිගට කරාම ඇති ය කියලයි කියන්නේ. ඇත්තට ම ඊට වඩා කරන්න නම් සුපිරි කාය ශක්තියකින් හෙබි තැනැත්තියක් වෙන්න ඕනි.
5. Imaginary Jump Rope
ඉස්සර ඉස්කෝලේ අරන් ගිහින් සෙල්ලම් කරපු ස්කිපින් ලණුව මතක ද? හැබැයි ගෙදර ලණු කෑල්ලක්වත් නැත්තම් ඒ ව්‍යායාමය ඒ විදියට ම කරන්නත් පුළුවන්. තමන්ගේ අතේ rope එක තියෙනවා කියලා හිතාගෙන අත් දෙකෙන් කරකවමින් හිමීට උඩ පනින්න. දණහිස් ගල් කරගන්න යන්න නම් එපා. ඉතා සැහැල්ලුවෙන් විනාඩි 2ක් විතර උඩ පැනලා විනාඩියක විවේකයක් ගන්න. ඊට පස්සේ ආයිත් පනින්න. මේක තුන් පාරක් විය යුතුයි.
6. Bear Crawl
ආපහු පොඩි කාලේ පැත්තේ රවුමක් දාන්නත් එක්ක මේ ව්‍යායාමය කරමු. මේ නමින් තියෙන විදියට ම මේක වළහෙක් නැත්නම් ඒ වගේ වෙනත් සිව්පාවෙක් වගේ ඇවිදින්න තියන ව්‍යායාමයක්. දණහිස් බිම ගාවන්නේ නැතුව නැවිලා උරහිස්වලට වඩා ඉහළින් පසුපස ඔසවලා වලස් ගමනින් එහෙමෙහෙ යන්නයි තියෙන්නේ. ශරීරයේ ඉහළ කොටසේ බර නැති කරන ව්‍යායාමයක් ලෙස පිළිගැනෙනවා
7. Side Fat Workout
මේකේ ව්‍යායාම විධි 4ක් අන්තර්ගත වෙලා තියනවා. ඇඟ උණුසුම් කරන ව්‍යායාමයක්, මාංශපේෂි ඇදෙන ව්‍යායාමයක් විනාඩිය බැගින් කරලා අහවර වෙන්න. ඊට පස්සේ එන්නේ එක තැන උඩ පැනීම. ඒක කරන්නත් ඕනෑ විශේෂ විදියකට ශරීරයේ උඩ කොටස කෙලින් තියාගෙන කකුල් දෙක වමට සහ දකුණට පිළිවෙළින් හරවලා කරන උඩ පැනිල්ලක් තමයි මෙතන තියෙන්නේ. තත්පර 30ක් එක දිගට කරලා තත්පර 10ක විවේකයක් ගන්න පුළුවන්. මේක පස් වතාවක් කරන්න. දවසට දෙවරක් බැගින් දහ වතාවක් කරන්න. ඊට පස්සේ එනවා එක තැන ඇවිදීම. හරියට march එකක දී ඉදිරියට ඇදෙනවා වගේ. මේක පහළ තියෙන වීඩියෝවේ හරියට ම කරලා පෙන්වනවා. ඒකත් එක්ක ම එකට කරන්න
Leave a Reply