ආයාසයකින් තොරව ඇඟේ බර ෂේප් කරගන්න පුළුවන් චැලේන්ජස් ටිකක්

ඇඟේ බර විද්‍යානුකූල සහ නියමාකාර විදියකට අඩු කරගන්න නං කරන්න පුළුවන් මොනවද? ප්ලෑන් එකකට අනුගත වෙලා ජිම් එකකට යන්න පුළුවන්. ඩයටීෂියන් කෙනෙක් මුණගැහිලා තමුන්ගේ බරට, උසට සරිලන ඩයට් ප්ලෑන් එකක් හොයාගන්න පුළුවන්. ඔය දෙක අනිවාර්ය වුනත් අපේ උන්දැලා ඇඟේ බර අඩුකරගන්න කියලා කරන්නෙ එකේක වීඩියෝවල තියෙන විදියට ජාති තුන හතරක් එකට දාලා බීම ජාති බොන එකයි, කඩේ තියෙන එකේක බීම ජාති අත්හදා බලන එකයි. එහෙම කරන්නෙ අපි ෂෝට් කට් එකෙන් ගොඩයන්න ආසා නිසායි. එහෙම වැඩ කරන එකේ අවුලක් තියෙනවනෙ. අපිත් මේ කියන්නෙ ඒ තරං අමාරුවෙන් කරන්න සිද්ධ නොවෙන ෂෝට් කට්ස් ටිකක් ගැන.

හැබැයි මේ කතාව වෙනස්. පළවෙනි දේ තමයි මේ දේවල් ඔබට නිතර කරන්නට පුළුවන් තරමේ සුළු දේවල් වීම. දෙවැන්න තමයි මේවායින් මහා නරකක් සිද්ධ නොවීම. අනික මේවා සුළුවෙන් පටන් අරගෙන තමුන් එක්කම කරන්න පුළුවන් චැලේන්ජ්ස් වීම. අනික මේ දේවල්වලින් ඇඟේ බර තරමක් ෂේප් වුනාට පස්සෙ ජිම් එකකට වගේම නියමාකාර ඩයට් ප්ලෑන් එකකට යන්නත් ඔයාලව මෝටිවේට් වේවි. හැබැයි මේ දේවල් ඔක්කොම එකගොඩේ කරන්නනං යන්නෙපා.

 

1. සීනි

සීනි කියන්නෙ සිරුරේ මහත වැඩි කරන දෙයක් වගේම පෙනුම අවලස්සන කරන දෙයක්. ඒ වෙනුවෙන් තමයි මේ චැලේන්ජ් එක කරන්න පුළුවන්. මෙවුව අලුත් අවුරුදු රෙසලූෂන්ස් විදියට තියාගත්තත් අවුලක් නෑ. දැන් අපේ චැලේන්ජ් එක මෙහෙමයි. ඔයාට පුළුවන්ද සතියක් යනකං වතුර ඇරෙන්නට වෙනත් කිසිඳු බීමක් නොබී ඉන්න. මොකද තේ, කෝපි ඇතුළු විවිධ වූ පානයන් හරහා අපේ සිරුරට එකතු වෙන සීනි ප්‍රමාණය නොදැනුවත්වම අතිශය ඉහළයි. පළමු සතිය තරමක් අමාරු වුනත් (ඇත්තටම අමාරුවටත් වඩා අමතක වීම තමයි වැඩි) දෙවැනි සතිය කිසිසේත්ම අමාරු වෙන්නෙ නෑ. මේ විදියට ගිහින් ටික ටික ස්ටෙප්ස් වැඩි කරන්න. සති දෙක, මාසය වගේම මාස තුනක් විදියට සාර්ථකව චැලේන්ජ් එක දිනද්දි අපිට පුළුවන් සීනි සහිත ආහාර වෙන චොකලට් ඇතුළු රසකැවිලිත් නවත්තන තැනට හිත හදාගන්න.

 

2. නිතර බර කිරන්න

මේකත් ඇඟේ බර ෂේප් වෙන්න නියම වැඩක්. ඒ තමයි නිරන්තරයෙන් බර බලන එක. ඒක කොහොමද ඇඟට හොඳක් වෙන්නෙ කියල හිතුවද? ඒක තනිකරම මයින්ඩ් ගේම් එකක්. මෙහෙමනෙ. ලොකු බත් පිඟානක් කාලා බර කිරුවම තත්ත්වෙ බරපතලයි කියලා තේරෙනවා. ටොයිලට් ගිහින් ඇවිත් බර කිරුවම හිතට යම් සහනයක් දැනෙනවා. අන්න ඒනිසා මේ කියන වැඩෙන් අපිට අපේ බර පාලනය වෙනුවෙන් අපිටම කරගන්න පුළුවන් සීමා කිරීම් ඉබේම සිද්ධ වෙනවා. ඇත්තටම මෙතනදි වෙන්නෙ මේකයි. සාමාන්‍යයෙන් කවුරුහරි දැන් ඉතිං බර චුට්ටක් අඩු කරගත්තනං හරි කියල කිවුවම බෙල්ල කන්න හිතෙනවනෙ. මේකෙදි තරාදිය බලන වාරයක් පාසා අපේ හිතම ඒක අපිට කියනවා.

 

3. පොඩ්ඩ පොඩ්ඩ

මෙවුවත් ජිමික්. ඒ තමයි හිත ෂේප් කරගැනීම. දැන් අපි සාමාන්‍යයෙන් ගෙදර ඉන්න දවසට අති විශාල බත් පිඟන් තුනක් බඩේ හලාගන්නවානෙ. අපි නිවසෙන් බැහැරව හිටියත් කොත්තු රොටි, පරාටා වගේ බර කෑම කැවෙනවනෙ. අන්න ඒ වෙනුවට ඕනම තැනකදි කරන්න පුළුවන් දෙයක් තමයි මේ. එක් ප්‍රධාන ආහාර වේලක් තියාගෙන ඉතිරි ඒවා මගහරින්න. උදේට පොඩ්ඩක් කන්න. සාමාන්‍යයෙන් බඩ ඉක්මනින් පුරවලා දාන දෙයකින් කුඩා ප්‍රමාණයක්. උදාහරණයකට කඩල, ඕට්ස්, කල් කිරි, කෝන් ෆ්ලේක්ස් වගේ දෙයක් වැඩේට කදිමයි. මේවායින් මහ ගොඩක් නොකා, ඒ මොහොතේ බඩගින්න ෂේප් කරගන්න. මේ විදියට පළතුරකින්, මස් කෑල්ලකින් වගේ දේකින් වේල් පහක් විතර ඇද්දත් අර අති විශාල බත් පළඟ තුනෙන් වෙන හානියට වඩා අඩු හානියක් තමයි වෙන්නෙ. මේ චැලේන්ජ් එක කරන අතරෙ ඒ ආහාරවල පෝෂ්‍යදායක බව ගැනත් හිතේ තියාගන්න.

මේකෙ අනිත් කොටස තමයි ආසා කරන කෑම කියන එක. බඩ අඩු කරගන්න ආසා මිනිස්සුන්ට හැමදාම අහන්න ලැබෙන්නෙ ග්‍රීන් ටී, ඕට්ස් වගේ කට අප්පිරියා වෙන කෑම බීම ජාතිනෙ. එහෙම නැතුව හැමදාම ආසා කරන කොත්තු, පාස්ටා කන්න. හැබැයි ප්‍රමාණය අඩු කරන්න. මේකත් ඉතිං ඩෝං ගාලා අඩු නොකර සතෙන් සතේ රුපියලෙන් රුපියල අඩු කරන්න. ආසා දේ කන නිසා හිතට දුකකුත් නෑ.

 

4. රෑට

රෑ කියන්නෙ ක්‍රියාශීලීබවෙන් අඩු කාලයක් නිසා රෑට අඩුවෙන් කන්න කියන එක බොහෝදෙනෙක් කියන දෙයක්. හැබැයි උදේටයි දවල්ටයි ලොකු බත් පිඟන් දෙකක් ගිල්ලට පස්සෙ රෑට අඩුවෙන් කන්න වෙන්නෙ නෑ. අනික බොහෝදෙනෙක් මහ රෑ වෙනකං ඇහැරගෙන ඉන්න නිසා රෑට ගොඩක් කන්නත් උවමනායි. අන්න ඒකට මේ සරළ පියවර ගන්න. පැයක් වේලාසනින් ඇහැරෙන්න. පැයක් වේලාසනින් නිදියන්න. මේ විදියට ඔබේ ජීවිත කාලසටහනේ රෑට වෙන් කරන වැඩ හැකි තරම් උදෑසන පැය කිහිපයේ කරන්නට උත්සාහ ගන්න. රෑ නිදහසේ තියාගන්න. වෙනදාට රාත්‍රී දොළහ වනතුරුත් ඇහැරී සිටියා නම්, පැයෙන් පැය වේලාසනින් නිදන්නට උත්සාහ කරන්න. ඒ පැයක කාලය උදෑසනින් අවදිවන්න. උදෑසනින් පිබිදීම සිරුරටත් පහසුවක් වේවි. මේ විදියට කරද්දි රෑ ආහාර වේල රාත්‍රියේ මුල්ම භාගය වෙච්චි පස්වරු 6.30ත් 7ත් අතරෙ අරගන්න. ඔබට නොදැනීම සිරුරේ බරේ වෙනසක් වේවි.

 

5. බස් හෝල්ට්

ජොගින් සීන් එකට ඇවිදින්න කිවුවම සමහරු කැමති නැහැනෙ. බල්ලො පන්නනව කියයි. අපිට කොයින්ද ඕවට වෙලාවක් කියල අහයි. ජොගින් කිට් අඳින්න බෑ කියයි. මොන ලැජ්ජාවක්ද ඒ කියල අහයි. හැබැයි අපි මේ කියන චැලේන්ජ් එක ඒ සිතුවිලි සියල්ලට උත්තර තියෙන ලේසි වැඩක්. සාමාන්‍යයෙන් බස් එකට නගින හෝල්ට් එක තියෙනවනෙ. ඒකට වඩා එක බස් හෝල්ට් එකක් වැඩිපුර දුර ඇවිදගෙන ගිහින් බස් එකට නගින්න. සාමාන්‍යයෙන් බස් එකෙන් බහින හෝල්ට් එක තියෙනවනෙ. ඒකට වඩා එක බස් හෝල්ට් එකක් කලින් බැහැලා ඉතිරිය පයින් ඇවිදින්න. මේකම හවසට කරන්නත් පුළුවන්. මේ දේ ඔෆිස්, ක්ලාස්, පාසල් හෝ වෙනත් ගමන් කියලා වෙනසක් නැතුව කරන්න පුළුවන්. ඒ වගේම මේ චැලේන්ජ් එක තරමක් වේලාසනින් පිබිදෙන්නත් හේතුවක් වේවි. සැළකිය යුතු දෙයක් තියෙනවා. අනිත් අය නොදන්නවා වුනාට අපි මේ ඇවිදින්නෙ ඇඟට හොඳක් වෙන්නනෙ. ඒ නිසා නාකි බල්ලො කොළඹ යනව වගේ යන්නැතුව පොඩ්ඩක් ඇක්ටිවු පිට වේගෙන් ඇවිදින්න හොඳේ.

 

6. බත් : මස්

මේකත් බරට බලපාන දෙයක්. ඒ තමයි බතට මසේ අනුපාතය. මස් කියලා කතාවට කිවුවට මේකට මාළුත් අදාළයි. පිෂ්ඨය ගොඩක් තියෙන බත් ප්‍රමාණය අඩු කරලා මස් හෝ මාළු හෝ එළවළු වර්ග ව්‍යංජන ලෙසින් වැඩිපුර ආහාරයට ගැනීම තමයි මේ චැලේන්ජ් එක. හිත හදාගන්න අමාරු වුනත් අපිට කරන්න තියෙන්නෙ එක දෙයයි. මෙච්චර දවස් බත් එක්ක අනාගෙන කාපු දේවල් ටික වෙනම කන්න පුරුදු වෙන එක විතරයි. බඩ පිරිල්ල අඩු වෙන්නෙත් නෑ. පිශ්ඨය ඇඟේ පිරෙන්නෙත් නෑ. කන බත් පොඩ්ඩ වුනත් කැකුළු හෝ නාඩු වගේ ගුණදායී හාල් විශේෂයකින් කන්න වග බලාගන්න.

 

7. කට වහගෙන

මේකත් චැලේන්ජ් එකක්. ගෙදර කට්ටියත් එක්කම කරන්න පුළුවන් චැලේන්ජ් එකක්. කද්දි කතා කරන්නෙපා කියලා ඉස්සර ඉඳන්ම කියනවනෙ. ඒ කියන්නෙ කතා කර කර කන එක කෑමට කරන අගෞරවයක් කියලයි. ඒත් ඒකෙ විද්‍යාත්මක පැත්තකුත් තියෙනවා. ඒ තමයි කෑම කද්දි කට විවර වුනාම ඒවත් එක්ක හුලං බඩට පිරෙන එක. ඒකෙන් බඩ පිම්බිච්ච තත්ත්වයක් උද්ගත වෙනවා. අන්න ඒ බඩට පිරෙන හුලං යවන්න බෙහෙතුත් තිබුනට මේ කියන්නෙ ඊට වඩා ලේසි වැඩක්. ඒ තමයි කද්දි කට වහගෙන හපන එක. කට වහගෙන හපද්දි වෙනදට වඩා ප්‍රමාණයෙන් පොඩි කෑම ප්‍රමාණයක් කටට පුරවගන්නත් අමතක කරන්නෙපා. මේ චැලේන්ජ් එකෙනුත් ඔබ නොහිතන විදියේ බරක් අඩු වෙන්න පුළුවන්.