මේ සිනමාපට 10 නැරඹුවොත් ඔබ කොරියානු සිනමාවට ඇබ්බැහි වෙනවා නිසැකයි!

කොරියන් චිත්‍රපට කියල කිවුවම අර ටීවී එකේ පෙන්නන නාට්‍ය වල වගේ ළඳ බොළඳ විදිහේ චිත්‍රයක් කෙනෙක්ට මැවෙන්න පුළුවන්. හැබැයි කොරියානු සිනමාව කියන්නේ ඊට වඩා හාත්පසින්ම වෙනස් කර්මාන්තයක්. බොහොම සුවිශේෂී විදිහේ කතා තේමාවන් රැගත් සීරියස් විදිහේ චිත්‍රපට රැසක් වසරකට කොරියානු සිනමාව තුළ බිහිවෙනවා. අපි මේ කියන්න යන්නේ පසුගිය දශකය දෙක ඇතුළත කොරියානු සිනමාවෙන් බිහිවුණු හොඳම චිත්‍රපට 10ක් ගැනයි. මේ චිත්‍රපට කීපයක් හරි නැරඹුවොත් ඔබත් කොරියානු චිත්‍රපට හොය හොයා බලන රසිකයෙක් වෙනවා නිසැකයි.

 

1. Oldboy (2003)

ලෝක සිනමාව ඇතුළේ කොරියානු සිනමා සලකුණ සැරටම සනිටුහන් කරන්න සමත් වෙච්ච චිත්‍රපටය හැටියට ඕල්ඩ්බෝයි හඳුන්වන්න පුළුවන්. මේකෙ ජනප්‍රියත්වය නිසාම පස්සෙ කාලෙකදි ‘ඕල්ඩ් බෝයි’ නමින්ම හොලිවුඩයේත්, ‘සින්දා’ නමින් බොලිවුඩයේත් ප්‍රතිනිර්මාණය වුණා. හැබැයි ඒ චිත්‍රපට එකකටවත් ඔරිජිනල් ඕල්ඩ්බෝයි අහලකටවත් එන්න අමාරුයි. ඕල්ඩ්බෝයි චිත්‍රපටයේ කතාවස්තුව මෙන්න මෙහෙමයි. එක් පුද්ගලයෙක්ව හිටිහැටියේ පැහැර ගැනීමකට ලක් වෙනවා. ඊට පස්සේ මේ පුද්ගලයාට සිද්ධ වෙනවා හුදෙකලා කුටියක් තුළ අවුරුදු 15ක්ම සිරගතව සිටින්නට. ඉන්පස්සේ හිටිහැටියේම ඔහුව නිදහස් කරනු ලබනවා. ඔහුගේ අරමුණ වෙන්නෙ තමන්ගේ ජීවිතෙන් අවුරුදු 15ක් කිසිම හේතුවක් නැතුව හොරකම් කරගත්තු පුද්ගලයාව හඹායෑමයි. ඒ හඹායාම කෙළවර වෙන්නේ ඔබ නොසිතන විදිහේ සිදුවීම් දාමයකට කතා නායකයට මුහුණ දෙන්න සිද්ධ වෙලයි.

 

2. Memories of Murder (2003)

මෙමරීස් ඔෆ් මර්ඩර් චිත්‍රපටයේ කතාව අයිති වෙන්නේ 1980 දශකයට. ඒ සමයේදී තරුණියන්ව පැහැරගෙන ගොස් මරාදමන දාම මිනීමරුවෙක්ගේ පසුපස පන්නන රහස් පරීක්ෂකයන් තිදෙනෙක් වටා තමයි මේ කතාව දිගහැරෙන්නෙ. මේ රහස් පරීක්ෂකයන් අති දක්ෂ අයවලුන් නෙමෙයි. ඔවුන්ගේ හැකියාවේ තරමට මේ මිනීමරුවා පසුපස්සෙන් කරන හඹායාම වෙලාවකට සිනහ උපද්දනසුළුයි. ඒ වගේම සිත සසළ කරවනසුළුයි. මොකකින් මොකක් වෙයිද කියලා හිතාගන්න බැරි විදිහටයි මේ මිනීමරුවා පසුපස හඹායාම සිද්ධ වෙන්නේ. චිත්‍රපටයේ අවසානය ඔබ බලාපොරොත්තු වන හොලිවුඩ් බොලිවුඩ් අවසානයක් නොවුනත්, නරඹන්නා තුළ යම්කිසි කම්පනයක් ඉතිරි කරන්නට මේ චිත්‍රපටය සමත් වෙනවා.

 

3. Train to Busan (2016)

කොරියානු සිනමාවේ විතරක් නෙමෙයි, ලෝක සිනමාව ගත්තත් පසුගිය දශකය දෙක ඇතුළත බිහිවුණ හොඳම සොම්බි චිත්‍රපටයක් හැටියට ට්‍රේන් ටු බූසාන් හඳුන්වන්න පුළුවන්. කාලයක් තිස්සේ එකතැන පල්වෙන සොම්බි කතන්දර වලට වෙනසක් ගේන්න මේ චිත්‍රපටයේ අධ්‍යක්ෂකවරයා සමත් වෙනවා. ඔහු ඒ වෙනස කරන්නේ මිනීමරු සොම්බි පිරිසක්ව මගී දුම්රියක් ඇතුළට කොටු කිරීමෙන්. මුල සිටන් ක්‍රියාදාම පිරුණු අති ධාවනකාරී වේගයකින් තමයි මේ චිත්‍රපටය ඇදී යන්නේ. මිනීමරු සොම්බින්ගේ ප්‍රචණ්ඩත්වය වගේම හිත්පිත් නැති මිනිසුන්ගේ දුෂ්ටත්වයත් එකසේ පිළිබිඹු කරවන ට්‍රේන් ටු බූසාන් ඔබ නැරඹිය යුතුම චිත්‍රපටයක්.

 

4. The Handmaiden (2016)

අපේ ලැයිස්තුවේ අංක එකට සඳහන් කරපු ඕල්ඩ්බෝයි චිත්‍රපටයේ අධ්‍යක්ෂකවරයා වන චෑන් වූක් පාර්ක්ගේම තමයි මේ චිත්‍රපටයත්. 1930 ගණන් වල කොරියාවේ සිද්ධ වෙන සිදුවීමක් තමයි මේ චිත්‍රපටයට ඇතුළත් වෙන්නේ. වංශවතෙක් සේ පෙනීසිටින වංචාකාරයෙක්, ධනවත් තරුණියක්ව ආදරයෙන් රවටාගෙන ඇගේ වස්තුව කොල්ලකන්න උත්සාහ කරනවා. මේ තරුණියගෙ ආදරය දිනාගැනීමේ සැලසුමේ කොටසක් හැටියට ඔහු ඇයගේ ජීවිතේට සේවිකාවක්ව ළං කරනවා ඔහු ගැන ඇගේ හිතේ ආදර අංකුර පැළ කරන්නට. ඕක තමයි චිත්‍රපටයේ ආරම්භය. එතනින් එහාට චිත්‍රපටය විස්තර කරන්නට යෑම ඔබේ රසවින්දනයට බාධාවක් වෙන්නට පුළුවන් නිසා අපි මෙතනින් නවතිනවා. හිතාගන්න බැරි දිශාවන් වලට කැරකෙන කතාවක් සහිත සුපිරි චිත්‍රපටයක් මේක.

 

5. Lady Vengeance (2005)

ඒ කාලේ අපේ රූපවාහිනියෙන් නිතර හමුවුණ අහිංසක චරිතය චංගුමී මතකද? ඒ චංගුමී චරිතය රඟදක්වපු ‘ලී යන්ග් ඒ’ නිළිය ඊට හාත්පසින්ම වෙනස් චරිතයක් නිරූපණය කරන චිත්‍රපටයක් තමයි ‘ලේඩි වෙන්ජන්ස්’. මේක ඇවිල්ලා පළිගැනීමේ කථාවක්. ‘සිම්පති ෆො මිස්ටර් වෙන්ජන්ස් ‘නැමැති චිත්‍රපටයෙන් ඇරඹෙන පළිගැනීමේ චිත්‍රපට ත්‍රිත්වයක් තියනවා. ඒ තමයි සිම්පති ෆො මිස්ටර් වෙන්ජන්ස්, ඕල්ඩ්බෝයි සහ අපි මේ කියන ලේඩි වෙන්ජන්ස්. මේ කතා තුන එකකට එකක් සම්බන්ධ නැති, එකකට එකක් වෙනස් පළිගැනීමේ කතා තුනක්. මේ අතරින් අපිට ඕල්ඩ් බෝයි චිත්‍රපටයට පසු ඉහළින්ම තියන්න පුළුවන් චිත්‍රපටය තමයි ලේඩි වෙන්ජන්ස්. තමන් නොකළ වරදකට සිර දඬුවම් විඳින්න සිද්ධ වෙන තරුණියක් තමන්ට සිර දඬුවම් නියම කරවන්නට හේතු වූ සැබෑ අපරාධකරු සොයායන කථාවක් රැගත් චිත්‍රපටයක් මේක.

 

6. The Wailing (2016)

2016 අවුරුද්දේ ආපු සුපිරිම චිත්‍රපටයක් තමයි මේ. හොරර් ශානරයට දාන්න පුළුවන් චිත්‍රපටයක්. එක්තරා කඳුකර ගම්මානයකට ඇතුළුවන ආගන්තුකයෙක් නිසා ඒ ගමට නොසිතූ කරදර කාලයක් උදාවෙනව. කුෂ්ටයක් එක්ක ඇරඹෙන අද්භූත රෝගයක් ගම්වැසියන් අතරේ පැතිරෙන්න පටන් ගන්නේ මරණයේ සෙවනැළි මවමින්. මේ ලෙඩේට ගොදුරු වන පුද්ගලයන් හැසිරෙන්නේ බිහිසුණු විදිහටයි. නොසිතූ ලෙස ගමට ආ මේ විපත පසුපස අර කලින් කියපු ආගන්තුකයා සිටිනවාදැයි ගමේ පොලිස් නිලධාරියෙක් පරීක්ෂණ අරඹනවා. ගම ආක්‍රමණය කර ඇති නපුර ජය ගන්නට ගුප්ත විද්‍යාවන්ගේ පිහිට පතන්නටද ඔවුන්ට සිදුවෙනවා. මේ සියලු ගැටුම් සමගින් ප්‍රේක්ෂක නෙත් සිනමාපටයට අලවා තබන්න සමත් රසවත් කතාවක් රැගත් චිත්‍රපටයක් ‘ද වේලින්ග්’ කියන්නේ.

 

7. Mother (2009)

තරුණියක්ව මරා දැමීමේ වරදට නිරපරාදේ සිරදඬුවම් නියම වූ තමන්ගේ පුතාව ගලවාගන්න උත්සාහ කරන මවක් ගැන කියවෙන කතාවක්. අම්මා කෙනෙක්ගේ ආදරය ගැන කියවෙන කතාවක් කියලා එක පැත්තකින් කියන්න පුළුවන් වුණත්, තවත් පැත්තකින් ගත්තහම මේක මිනිස් සිත් සතන් වල හැංගිලා තියෙන අන්ධකාරය සහ කුරිරු බව පෙන්වන්නක් කියලත් කියන්න පුළුවන්. තමන්ගේ පුතාව නිදහස් කිරීමේ මෙහෙයුම අරඹන මවට ක්‍රම ක්‍රමයෙන් ඇතුළු වන්නට වන්නේ අන්ධකාර වූත් ප්‍රචණ්ඩකාරී වූත් ලෝකයකටයි. ඒ අන්ධකාර ලෝකය මැවෙන්නේ ඇගේ අභ්‍යන්තර සිතුවිලි තුළින්ද? නැතිනම් ඒ මවකගේ ආදරයේ හැටිද? තීරණය නරඹන ඔබ සතුයි.

 

8. A Bittersweet Life (2005)

අපරාධ කල්ලියක සාමාජිකයෙක් වන තරුණයෙක්ට පැවරෙනවා අනියම් සම්බන්ධතාවයක් පවත්වාගෙන යන තමන්ගේ කල්ලියේ ප්‍රධානියාගේ පෙම්වතියව මරා දමන්න. නමුත් ඒ තරුණිය ගැන හිතේ යම් කැමැත්තක් තියෙන නිසා ඔහු ඇයට ජීවිත දානය දෙනවා. කොහොම නමුත් මේ සිදුවීම අපරාධ කල්ලියේ ප්‍රධානියාට ආරංචි වීම හින්දා තරුණයාගේ ජීවිතය අනතුරේ වැටෙනවා. තමන් කලක් සේවය කරපු පාතාල කල්ලියත්, තමන්ගේ හතුරු කල්ලියත් යන සියල්ලේම ඉලක්කය බවට ඔහු පත්වෙන්නේ ක්‍රියාදාම පිරුණු සටන් ජවනිකා රැසක් සමගින් සිද්ධ වන මහා ගැටුමකට මග පාදමින්. මේ ක්‍රියාදාම සටන් වලට යටින් දිවෙන යටි අර්ථයක් වගේම සංවේදී බවකුත් මවාපාන ඉහළ මට්ටමේ කොරියානු චිත්‍රපටයක් මේක.

 

9. I Saw the Devil (2010)

අතිශයින්ම ප්‍රචණ්ඩකාරී චිත්‍රපටයක් හැටියට මේක හඳුන්වන්න පුළුවන්. දාම මිනීමරුවෙකුත්, කොරියානු බුද්ධි අංශයේ ඒජන්තවරයෙක් වන තරුණයෙකුත් අතර ඇතිවෙන බිහිසුණු ගැටුමක් තමයි චිත්‍රපටයේ කතාව. තමන්ගේ පෙම්වතියව මරා දමනු ලැබූ දාම මිනීමරුවා පසුපස්සේ පන්නන ඇගේ පෙම්වතා වන බුද්ධි අංශ නිලධාරියා වරින් වර මී බළල් සෙල්ලමේ ආකාරයට දාම මිනීමරුවාව වධයට පමුණුවන්න පටන් ගන්නවා. මිනීමරුවාත් තමන් පසුපස පන්නන තරුණයාට රිද්දවන්නට සැලසුම් සකස් කරනවා. චිත්‍රපටය පුරාවට ඇදී යන මේ ලේ වැගිරෙන සටන් සමගින් ප්‍රේක්ෂකයාට අමතක නොවෙන අවසානයක් තිළිණ කරන්නට මේ චිත්‍රපටය සමත් වෙනවා.

 

10. The Man from Nowhere (2010)

මේකත් පළිගැනීමේ කතාවක්. ක්‍රියාදාම පිරුණු චිත්‍රපටයක්. තමන්ගේ ජීවිතයට සමීප කුඩා දැරියක්ව බේරා ගැනීමට අපරාධ කල්ලි එක්ක හැප්පෙන පුද්ගලයෙක් වටා ගෙතුණු කතාවක් මේක. මත්ද්‍රව්‍ය සම්බන්ධ සිදුවීමක් හින්දා මේ දැරියවත් ඇගේ මත්ලෝලී මවවත් අපරාධ කල්ලියක් විසින් පැහැරගනු ලබනවා. මේ දැරියව තමන්ගේ ජීවිතයේ එකම සමීපතමයා හැටියට සලකන අසල්වැසි තරුණයෙක් ඉන්නවා. ඔහු කරන්නේ දැරියව බේරාගන්නට ඒ අපරාධකරුවන්ට එරෙහිව සටනක් දියත් කරන එකයි. දැඩි ප්‍රචණ්ඩත්වය සපිරි චිත්‍රපටයක් වුණාට ඒ සියල්ල අතරේ හිතට සංවේදී හැඟීම් ගෙන එන්නටත් මේ චිත්‍රපටය සමත්.

Cover Image Source –  englishspectrum.com/ fanpop.com