එයාගෙන් කැමැත්ත අහන්න බයෙන්ද ඉන්නේ..? මෙන්න අපෙන් ටිප්ස් 7ක්

කෙල්ලෙක්ගෙන් කැමැත්ත අහන්න ඕනෑ කොල්ලෙක්ය කියලා මතයක් පෙරදිග රටවල ගොඩක් දුරට මුල් බැහැගෙන තියෙනවා. ඒත් ඉතින් කෙල්ලෙක් ගැන කොච්චර හීන තිබුණත් කෙල්ලෙක්ගෙන් කැමැත්ත අහන්න බය කොල්ලෝ කොච්චර ඉන්නවද? ඔන්න අද ලයිෆි අපි අපේ ලිපිය වෙන් කරන්නෙ ඒ කොල්ලො ටික වෙනුවෙනුයි. අපි ඔබට මේ කියන්න යන්නේ කෙල්ලෙක්ට මුල්ම වතාවට ආදරෙයි කියන ක්‍රම ටිකක් ගැන. කොල්ලනේ අතාරින්න එපා…

 

1. පළමු හමුවීම

ඔන්ලයින් මුණගැහුණු කෙල්ලෙක්ගෙන් නම් කැමැත්ත අහන්න හොඳම වෙලාව තමයි පළමු හමුවීම. කාලයක් තිස්සේ ගෑණු ළමයා එක්ක මැසේජ් කරලා, කෝල් කරලා හොඳ සම්බන්ධතාවයක් හදාගත්තු කොල්ලෙක්ට ආදරෙයි කියන්න මීට වඩා හොඳ වෙලාවක් තවත් නෑ. ලස්සන තැනක මූණට මූණ බලාගෙන වාඩි වෙලා, ටිකක් කතා කර කර ඉඳලා ඔබේ මැජික් වචනෙ (ආදරය) කිවුවම ගෑණු ළමයා “හා” කියනවා ශුවර්.

 

2. විශේෂ දිනයක්

හිත ගියපු ගෑණු ළමයගෙන් කැමැත්ත අහන්න ඇගේ උපන්දිනය ඇරෙන්න වෙන දවසක් නම් අපට හිතාගන්න බෑ. විශේෂ දවසක ඇයට ඔබේ කැමැත්ත කිවුවම ඇය ඒ ගැන ගොඩක් හිතන්න ඉඩ තියෙනවා. ආදරවන්තයින්ගේ දිනය කියල හඳුන්වන වැලන්ටයින් දවසත් ඔබේ ආදරය ප්‍රකාශ කරන්න හොඳ දවසක්. එහෙම දවසක් එනකම් ඉඳලා ආදරෙයි කියන එකෙන් ඔබේ ආදරය ගැන වගේම ඉවසීම ගැනත් පණිවිඩයක් ඔබේ හිත ගත්තු ගෑණු ළමයගෙ හිතට යාවි.

 

3. ෆිල්ම් හෝල් එකේදි

මේකනම් ඉතින් කරන්න පුලුවන් හොඳටම සමීප වෙලා යාළුවෙක් විදිහට ඉන්න ගෑණු ළමයගෙන් කැමැත්ත අහද්දියි. නැත්නම් ඉතින් දන්නෙවත් නැති ගෑණු ළමයෙක් ඔබත් එක්ක ෆිල්ම් බලන්න එන්නෙ නෑනෙ. කොහොම උනත් එහෙම ෆිල්ම් එකක් බලන්න ආවොත් හොඳ නිදහස් තැනක් තෝරගන්න. Avengers වගේ ෆිල්ම් එකක් අස්සේ කෙල්ලෙක්ගෙන් කැමැත්ත ඇහුවොත් ඒක ටිකක් සෙට් වෙන්නෙ නෑ වගේ නේද..? ඒක හන්දා ෆිල්ම් එකත් ආදරබර එකක් වෙන්න ඕනමයි.

 

4. ලියුම් කියුම්

මේක 70, 80 දශකයේ ක්‍රමයක් උනාට තාමත් මේ ක්‍රමේ වැඩ කරනවා. විශේෂයෙන්ම හිතේ තියෙන දේ කෙලින්ම කියාගන්න බැරි කොල්ලෙක්ට කරන්න පුලුවන් හොඳම වැඩේ ලියුමක් දෙන එක තමයි. ලියුමක් කියන්නෙ ආදරය වෙනුවෙන් කැපවෙනවා කියලා පෙන්නන හොඳ සංකේතයක්. ලියුමක් ලියනකොට වෙනම වෙලාවක් අරගෙන හොඳට හිතලා බලලා ලියන්න ගන්න. ලස්සනට ආදරබර විදිහට ලියුම ලියන්නත්, ලස්සන ලියුම් කවරෙක දාල ඒක දෙන්නත් අමතක කරන්න එපා. ඒ වගේම ලියුම දෙද්දී ගෑණු ළමයා තනිවෙන වෙලාවක් බලලා දෙනවනම් තමා ගෑණු ළමයත් කැමති.

 

5. තෑග්ගක් එක්ක

තෑග්ගක් දෙන ගමන් කැමැත්ත අහන එකත් හොඳ ක්‍රමයක්. හැබැයි ඉතින් ඒත් ගෑණු ළමයා ටිකක් හරි අඳුරන කෙනෙක් වෙන්න ඕන. නන්නාඳුනන මනුස්සයෙක් ඇවිල්ලා දෙන දේවල් ගන්න එපා කියලනේ තියෙන්නේ. ඒ හන්දා ඔබ හිතින් විතරක් පෙම් කරන වැඩිය මූණටවත් මුලිච්චි වෙන්නෙ නැති කෙල්ලොන්ට තෑගි දීලා ගුටි කනවා එහෙම නෙමෙයි. තෑග්ග පොඩි දෙයක් වෙනවනම් තමා හොඳ. පොඩි මුද්දක්, මාලයක්, බ්‍රේස්ලට් එකක් වගේ දෙයක්නම් වඩා හොඳයි. ඕව කැරට් විසි හතරෙ රත්තරං වෙන්නත්, ඉමිටේෂන් වෙන්නත් පුලුවන්. ආදරේට ඒව බලපාන්නැති බව මතක තියාගන්න.

 

6. වෙනස් දෙයක්

තරුණ උදවිය ඉතින් බලාපොරොත්තු වෙන්නේ වෙනස් දේවල්, අලුත් දේවල් නේ. ගෑණු ළමයිනුත් ආසයි ඉතින් තමන්ගෙ ආදරය වෙනස් විදිහකට පටන් ගන්න. ඒකට ඉතින් බැක්ග්‍රවුන්ඩ් එක හදන්න ඕන කොල්ල තමයි. වෙනස් දෙයක් කියන්නේ මොකක්ද? අමුතු විදිහේ සප්‍රයිස් කිරීමක් වෙන්න පුලුවන්. මේ වගේ පුදුම කරවීම් ගැන වීඩියෝ අන්තර්ජාලය ඇසුරු කරන ඔබට නම් අමුතු නැතුව ඇති. ඒ වගේම මතක තියාගන්න ඕන දේ තමයි මෙහෙම දෙයක් වෙද්දී ගෑණු ළමය හිතන විදිහ ගැනත් ටිකක් හිතන්න ඕනය කියන එක.

ඒ කියන්නෙ, ගෑණු ළමයා වැඩිය සමාජශීලී නැති කෙනෙක්නම් තවත් පිරිසක් එකතු කරගෙන කරන පුදුම කිරීමක් එයාට ගැළපෙන එකක් නෑ. ගෑණු ළමයා ගොඩක් විවෘත සමාජශීලී කෙනෙක්නම් තව සෙට් එකක් එක්කාසු කරගෙන මෙහෙම වෙනස් විදිහේ ආදර යෝජනාවක් කළත් කමක් නැහැ.

 

7. වැඩි වැඩ නැතුව කෙලින්ම

කෙලින්ම කැමැත්ත අහනවා කියන්නේ “සිරියාවේ යුද්ධය” ගැන කතා කර කර ඉන්න ගමන් “මං ඔයාට ආදරෙයි… ඔයා මට ආදරෙයිද..?” වගේ කැමැත්ත ඇහිල්ලක් ගැන නෙමෙයි. වැඩි කැටයම් නැතුව ඊට අවශ්‍ය පසුබිම හෙමින් සීරුවෙ හදාගෙන තමන්ම කැමැත්ත අහන එක. පසුබිම හදාගන්නවා කිවුවේ මොකක්ද..? ඔබ ඇය එක්ක කෝල් එකක හෝ චැට් කරන ගමන් නම් ඉන්නේ, කැමැත්ත අහන්න කලින් ආදරය ගැන, ඔබේ ජීවිතය ගැන, ඇගේ ජීවිතය ගැන වගේ මාතෘකා ඔස්සේ කතාව මෙහෙයෙවුවොත් ඒක වඩාත් හොඳ වේවි.

කොහොම උනත්, මොන ක්‍රමයට උනත් කැමැත්ත අහන්න කලින් ඇයට ඔබේ ආදරය ගැන ඉඟියක් වගේ දීල තියන්න ඕන. එතකොට ඇයත් ඔබට කැමතිනම් ඉඟි දෙනවා සත්තයි. අන්න එතකොට පුරුෂ ශක්තිය අරගෙන මේ ක්‍රම වලින් එකකට කැමැත්ත අහන්න. ආදරය ප්‍රකාශ කරන්න. වරදින එකක් නම් නෑ.

 
Cover Image Source – videoblocks.com