පියාඹන කැමරාව හැර ඩ්‍රෝන භාවිතා වෙන වෙනත් අවස්ථා

ඩ්‍රෝන යානා ලෙස සරලව හැඳින්වුවත් ඩ්‍රෝන යානා හඳුන්වන නිවැරදි නම මිනිසුන් රහිත ගුවන් යානා, ඩ්‍රෝන හඳුන්වන තාක්ෂණික නාමය වේ. මිනිසුන් රහිත යානා කලක පටන් විවිධ පරාසවල කාර්යයන්ට භාවිත වුණත්  නූතනයේ ඩ්‍රෝන තාක්ෂනය වඩ වඩාත් මහජනයා අතර මෙන්ම වෘත්තියමය ක්ෂේත්‍රයන් අතරද ප්‍රචලිත වෙමින් පවතී.

 

1. කෘෂිකාර්මික භාවිත

විශාල යායවල් ලෙස ගොවිතැන සිදුකරන ඇමරිකා එක්සත් ජනපදය තුල ගොවිතැන සඳහා යන්ත්‍ර සූත්‍ර භාවිතය සාපේකෂව වැඩිය. වර්ගකිලෝමීටර ගණනාවක් විශාල වපසරියක පැතිර ඇති වගාවක එක් එක් කොටසේ තත්ත්වය කෙසේදැයි බැලීමම විශාල කාර්යයකි. ඩ්‍රෝන යානා යැවීම මගින්, පසේ ස්වභාවය, බෝගයේ වර්ධනය, පලිබෝධ හානි, බෝගවල පෝෂණය ආදී තත්ත්වයන් නිරීක්ෂණය කිරීමේ හැකියාව තිබේ. මෙය බෝගය දෙස බලා සාස්තර කියනවා වැනි සරල වූ යෙදුමක් නොවේ. ඒ සඳහාම සැකසූ මෘදුකාංග භාවිතා කොට ඩ්‍රෝනයේ සවිකළ සෙන්සර් මගින් එන දත්ත විග්‍රහ කොට බෝග වගාවන් පිළිබද දත්ත සැපයීමට නූතන ඩ්‍රෝන තාක්ෂණය සමත්ය.

 

2. විශාල ව්‍යාපෘති අධීක්ෂණය සඳහා

ඇමරිකාව සහ කැනඩාව වෙන්කෙරෙන නයගරා දිය ඇල්ල ආශ්‍රිතව විශාල ජලවිදුලි බලාගාරයකි. ශීත කාලයට මිදෙන හිම මෙම ජලාශයට එකතුවීම වැළැක්වීම සදහා පාරු වැනි පද්ධතියක් බලාගාරයේ ආරක්ෂාව පිණිස ස්ථාපනය කොට තිබේ. එහෙත් ජලාශයට අයිස් එකතු වීමේ අවධානම අඩු කරන මෙම පද්ධතිය නිරන්තරයෙන් නිරීක්ෂණය කිරීමට අවශ්‍යය. භූගෝලීය හුදකලාව පිහිටි එම ප්‍රදේශය නිරීක්ෂණය කිරීමට හෙලිකොප්ටර හෝ බෝට්ටු සේවාවන් ක්‍රියාත්මක වන්නේ නම් ඒ එක නිරීක්ෂණ වාරයකට ඇමරිකානු ඩොලර් 3000කට වඩා වැඩි මුදලක් වැය වේ. එහෙත් ඩ්‍රෝන යානා භාවිතය නිසා එම පිරිවැය ඇමරිකානු ඩොලර් 400 දක්වා අඩු වී තිබේ. මේ ආකාරයට සැතපුම් දහස් ගණනක් දිවෙන විදුලිබල රැහැන්, තෙල් නල, ආදිය නිරීක්ෂණය කිරීමට ඩ්‍රෝන යොදාගන්නට හැකිවීම පහසුවකි.

ලංකාවේ වුවද කඳුකරයේ චාරිකා කරන ඔබට කඳුකරය හරහා ඇදි විදුලි රැහන් පද්ධති දැකගත හැකිවනු ඇත. එවැනි පද්ධති කරා ලඟාවීම සැබැවින්ම අපහසුය. නුදුරු අනාගතයේ මිනිසුන් රහිත ඩ්‍රෝන යානා තාක්ෂණය දියුණු වීමත් සමග මෙවැනි පද්ධති නිරීක්ෂණය කොට දෝෂ වාර්ථා කිරිම වියදම් අඩුවෙන් කළ හැකි වනු ඇත.

 

3. විපත් කළමනාකරණය පිණිස

විපත් ඇති වූ කල සාමාන්‍ය සාම්ප්‍රදායික සැපයුම් මාර්ග සියල්ලම පාහේ බිද වැටේ. විපතකදී සන්නිවේදන පහසුකම් පවා බිදවැටේ. එවන් අවස්ථාවලදී ඩ්‍රෝන යානා භාවිතා කොට අතුරුදන් වූවන් සෙවීම, විපත නිසි පරිදි සිතියම්ගත කරගැනීම ඇමරිකාව වැනි දියුණු රටවලදී සිදුකරගනු ලැබේ.

විපත් සිදුවූ කල විපතට පත් ජනයා ගලවා ගැන්ම සේම විපත් හදුනාගැනීමටද ඩ්‍රෝන යානා වලින් ලැබෙන්නේ මනා පිටුවහලකි. නාය යෑම් වැනි ස්වභාවික විපත් එකවර බැලූබැල්මට හදුනාගැනීමට අපහසු වුවත් ඩ්‍රෝන භාවිතයෙන් සුලු පිපිරීම්, දියදහරා ඇතිවීම් සහ කන්දේ වෙනස්කම් හඳුනාගත හැකිය. එවිට ඒ අවධානම හදුනාගැනීමත් ඒ සදහා පියවර යෙදීමත් පහසුය. ගංවතුර සුළි කුණාටු භූමිකම්පා, ගිනි කඳු, සුනාමි ආදී උවදුරු වලදී විශාල හෙලිකොප්ටර යානා හෝ වෙනත් ප්‍රවාහන මාධ්‍යයන් වලට වඩා ඩ්‍රෝන යානා හැසිරවීම පහසුය. සාමාන්‍ය කැමරා යෙදුම් වලට ගන්නා කුඩා ඩ්‍රෝන යානා සේම මෙන් කාරණා සඳහා විශේෂයෙන් සැකසූ විශාල ඩ්‍රෝන යානාද දැන් දැන් නිපදවෙමින් පවතී.

 

4. හමුදාමය යෙදීම් පිණීස

මිහයීල් කලෂ්නිකොව් යනු රුසියානු ජනරාල්වරයෙකි. ඔහු මූළිකවී තැනූ AK47 නම් ගිනි අවිය ලොව පුරා බොහෝ කලක් ජනප්‍රිය වී තිබුණි. මියහීල් කලෂ්නිකොව් ගේ සමාගම වර්ථමානයේදී විවිධ ආකාරයේ ගිනි අවි නිපදවීමේ යෙදී සිටිති. ඔවුන්ගේ මීළඟ අරමුණ වී ඇත්තේ ඩ්‍රෝන යානා භාවිතා කරමින් දියුණු පියාසැරි ආයුධයක් නිර්මාණය කිරීමයි. ලංකාවේ පැවති ත්‍රස්ථවාදී යුද්ධයේදීද ඉරාක ඇෆ්ඝනිස්ථාන යුද්ධයේදීද ස්නයිපර් විසින් විශාල වැඩ කොටසක් කරන ලදී. ඇතැම් විටක කිලෝමීටර දෙක තුන ඈතින් පිහිටි ස්ථාන වලට පවා ස්නයිපර් උණ්ඩ යැවීමට හමුදාවෝ සමත් වූහ. එහෙත් ගුවනින් අසුරු සැණින් ගොස් සතුරන් විනාශ කොට ඒමේ ප්‍රබල හැකියාවකින් යුතු ඩ්‍රෝන යානාවෝ ඉදිරියේදී ස්නයිපර් වලටත් වඩා බලගතු දිගුදුර අවියක් වනු නොඅනුමානය.

සංග්‍රාමීය දක්ෂතාවයන් අතින් ලොව අගතැන්පත් රටක් වන ඊශ්‍රායලය ද ඩ්‍රෝන තාක්ෂණය යහමින් භාවිතා කළ රටකි. ඉන්දියාව මෑතකදී ඊශ්‍රායලයේ ඩ්‍රෝන තාක්ෂණය සිය හමුදාවන්ට යොදාගන්නට අදහස් කරගෙන තිබේ. අයිසිස් වරුන්ද පසුගිය මාර්තුවේදී විරුද්ධ පාර්ශවීය හමුදා වෙත ඩ්‍රෝන ආධාරයෙන් ප්‍රහාර දියත් කිරීමට පටන් ගෙන තිබුණි. මිලිටරිමය යෙදීම් වලදී ඩ්‍රෝන ලෙස හැඳින්වුවත් මෙම යානා කැමරා ඩ්‍රෝන වලට වඩා හැඩයෙන් වෙනස්ය. මිනිසුන් රහිත තරමක් විශාලතර මෙම යානා බලගතු පියාසර හැකියාවකින් මෙන්ම තාක්ෂණයෙන්ද වඩාත් ඉදිරිගාමී යානා වේ. ලෝකයේ මීළඟට ඇතිවන යුද්ධ කටයුතු වලදී ඩ්‍රෝන යානා වැඩිවශයෙන් යොදාගනු ඇත.

 

5. සිවිල් ඉදිකිරීම් සදහා

ඩ්‍රෝන යානා වලට කැමර් වලට වඩා තවත් සංකීර්ණ සංවේදක ආදියද සවිකළ හැකිය. ඒ ඔස්සේ සෙන්සර් යොදාගෙන විශාල ඉදිකිරිම් ආදයේ ඇති සම්බන්ධතා ආදිය නිරීක්ෂණය කිරීම දියුණු වෙමින් පවතින තාක්ෂණයකි. උදාහරණ ලෙස ඉදිකරමින් යන පාලමක් වැනි යෙදීමකදී ඇතැම් විට මිනිසුන් ළඟා වී උපකරණ රැගෙන එක් එක් ස්ථානයන්හි සවිකිරීම් ආදිය නිසිපරිදි සිදුවීදැයි බැලීම අපහසු කාර්යයකි. එවන් විටක ඩ්‍රෝන තාක්ෂනයේ ආධාරයෙන් තාක්ෂණිකව ස්කෑන් කර අදාල ශක්තිමත් බව පිළිබද පර්යේෂණ කළ හැකිය.

මහා පරිමාණ ගොඩනැගිලි සහ සැකිලි සැකසීමේදී සැලැස්මට අනුකූලව නිසි කටයුතු සිදුවේද? යම් දුර්වලතා වෙත් නම් ඒ මොනවාද යැයි බලාගැනීමට පෙර කලදී බොහෝ අපහසුවෙන් කළ කටයුත්තකි. හෙලිකොප්ටර් භාවිතා කල හැකි වුවද ගොඩනැගිලි වැඩබිමක හෙලිකොප්ටර් හැසිරවීම දක්ෂ නියමුවකුට පවා තරමක් අසීරු රාජකාරියකි. ගොඩනැගිලි සැකැස්මක ප්‍රවර්ධනය බලාගන්නට ද ඩ්‍රෝන යානා සරලවම යොදාගත හැකිය. එනම් අවශ්‍ය වේගයෙන් ඉදිකිරීම් සිදුවන්නේද යන්න පවා ඉක්මණින්ම දැනගැනීමට ඩ්‍රෝන භාවිතා වේ.

 

6. ඩ්‍රෝන සහ නීති

ඩ්‍රෝන භාවිතා වන සෑම දියුණු රටකම පාහේ ඩ්‍රෝන සදහා විශේෂ නීති මාලා සකසා තිබේ. ඩ්‍රෝන උඩයැවීම පහසු වුවත් උඩින් ගොස් අනෙකාට නොදැනී ලංවන්නට හැකිවීම තුල මිනිසුන්ගේ පුද්ගලිකත්වය දැඩි ලෙස අභියෝගයට ලක් වේ. එය එක් පසෙකින් වැදගත් පුද්ගලයින්ගේ ආරක්ෂාවටද දැඩි තර්ජනයකි. ලංකාවේද ඩ්‍රෝන සදහා දැඩි නීති පද්ධති සකස් කොට තවත් ඒවා වැඩිදියුණු කරමින් පවතී. කෙසේ වෙතත් අයහපත් ප්‍රතිඵල තිබූ පලියට ගුවනින් පොළොව මත බොහෝ තැන්වලට ළඟා වීමේ විශ්මිත හැකියාවකින් යුතු ඩ්‍රෝන යානා ප්‍රතිෂේප කිරීම හෝ දැඩි ලෙස පාලනය කිරීම ඩ්‍රෝන සම්බන්ධ නූතන ක්ෂේත්‍රයන්හි දියුණුවට බාධාවක් විය හැකිය. එබැවින් ආරක්ෂාව ගැන වැඩපිළිවෙල සකස් කිරීම සේම වැදගත් අවශ්‍යතා සදහා සරලව ඩ්‍රෝන භාවිතා කළ හැකි පරිදි යාන්ත්‍රණයක් ස්ථාපිත වීමත් සිදුවිය යුතුය.

 
Cover Image Source – leonavia.com